https://www.zirve.edu.az/
28.07.2020 12:36
Kolleclərə ərizə verməyən 9-cu sinif şagirdləri üçün  buraxılış imtahanı bu tarixdə keçiriləcək

Dövlət İmtahan Mərkəzi (DİM) tərəfindən iyulun 29-30-da buraxılış (qəbul) imtahanları keçiriləcək.

 

Sərtləşdirilmiş karantin rejimi tətbiq olunan şəhər və rayonlarda imtahanların keçirilməsi ilə bağlı Dövlət İmtahan Mərkəzinin Direktorlar Şurasının müraciətinə Nazirlər Kabineti yanında Operativ Qərargah tərəfindən müsbət cavab verilib və imtahanlar pandemiya şəraiti və xüsusi karantin rejimi tələblərinə uyğun olaraq təşkil ediləcək.

 

DİM-dən AzEdu.az-a verilən məlumata, bu imtahanlarda iştirakçıların kütləviliyinin azaldılması məqsədilə kolleclərə (və ya hərbi liseylərə) ərizə verməyən 9-cu sinif şagirdləri iştirak etməyəcəklər. Həmin şagirdlər üçün buraxılış imtahanı sentyabr ayında keçiriləcək.

 

Qeyd edək ki, 11 illik orta təhsil bazasında kolleclərə, ali təhsil müəssisələrinə sənəd verməyən şagirdlər, eləcə də tədrisi ingilis və fransız dilində olan məktəblərin 9-cu sinif şagirdləri üçün imtahana buraxılış vərəqəsi qoyulsa da, ictimai sağlamlığın qorunması ilə bağlı həyata keçirilən tədbirlərə uyğun olaraq onlar iyul ayında keçirilən buraxılış imtahanlarında iştirak etməyə bilərlər. Həmin şagirdlər buraxılış imtahanını sentyabr ayında verə bilərlər.