James Webb Kosmik Teleskopu ilə aparılan müşahidələr zamanı astronomlar Böyük Partlayışdan cəmi 700 milyon il sonraya aid 50 milyon Günəş kütləli superkütləvi qara dəlik aşkar ediblər.
AzEdu.az xarici mediaya istinadən xəbər verir ki, “Abell2744-QSO1” adlı obyekt kainatın erkən dövrünə aid ən qeyri-adi kəşflərdən biri hesab olunur.
Araşdırmalar göstərib ki, qara dəlik yerləşdiyi qalaktikanın kütləsinin böyük hissəsini təşkil edir ki, bu da mövcud astrofizika nəzəriyyələrinə ziddir.
Alimlər obyektin tərkibində ağır elementlərin demək olar ki, olmadığını müəyyən ediblər. Bu isə qara dəliyin ulduzların yaranmasından əvvəl formalaşmış ola biləcəyi ehtimalını gücləndirir.
Kəşf “Nature” və “Monthly Notices of the Royal Astronomical Society” jurnallarında dərc olunub. Mütəxəssislər hesab edir ki, nəticələr qara dəliklərin yaranması ilə bağlı nəzəriyyələrin yenidən nəzərdən keçirilməsinə səbəb ola bilər.
