Alimlər Günəşin Yerdən görünməyən hissəsində son illərin ən təhlükəli aktivlik ocaqlarından hesab edilən nəhəng ləkə qrupu müşahidə ediblər.
AzEdu.az xarici KİV-ə istinadən xəbər verir ki, bu barədə Rusiya Elmlər Akademiyasının Kosmik Tədqiqatlar İnstitutunun Günəş Astronomiyası Laboratoriyası məlumat yayıb.
Mütəxəssislərin sözlərinə görə, yeni aşkarlanan struktur potensial olaraq güclü təhlükə yaratsa da, onun Yer üçün mümkün təsirlərini indidən dəqiq proqnozlaşdırmaq mümkün deyil.
Qeyd olunur ki, bu tip Günəş strukturları güclü partlayışlara və plazma kütləsinin kosmosa atılmasına səbəb ola bilər. Bu isə Yer kürəsində güclü geomaqnit qasırğalarının yaranma riskini artırır.
Hazırda alimlər Günəşin görünməyən tərəfindəki aktivliyi davamlı şəkildə izləyirlər. Təxminən bir həftə sonra həmin ləkə qrupunun Yer kürəsindən görünən hissəyə keçəcəyi gözlənilir.
Ekspertlərin bildirdiyinə görə, daha bir həftə sonra isə həmin aktiv zona Yerlə tam üzbəüz mövqedə yerləşə bilər.
Bununla belə, alimlər qarşıdakı iki həftə ərzində həmin ləkələrin bir neçə partlayışdan sonra tamamilə yox ola biləcəyini də istisna etmirlər.
Hazırda bölgədə yüksək səviyyəli aktivlik qeydə alınmasa da, mütəxəssislər vəziyyətin sürətlə dəyişə biləcəyini vurğulayırlar.
