Cənubi Koreyalı alimlər süni intellektin bilmədiyi mövzularda yanlış məlumat vermək əvəzinə qeyri-müəyyənliyini qəbul etməsini təmin edən yeni üsul hazırlayıblar.
AzEdu.az xarici mediaya istinadən xəbər verir ki, bu yanaşma xüsusilə səhiyyə və avtonom idarəetmə kimi kritik sahələrdə etibarlılığı artıra bilər.
Mütəxəssislərin sözlərinə görə, süni intellekt sistemlərinin əsas problemlərindən biri “həddindən artıq özünəinam”dır. Bu sistemlər əmin olmadıqları hallarda belə qəti cavablar verə bilir. OpenAI tərəfindən hazırlanan ChatGPT kimi modellərin bəzən yanlış məlumatları həqiqət kimi təqdim etməsi “hallüsinasiya” adlandırılır.
Tədqiqatçılar problemi həll etmək üçün insan beyninin işləmə prinsipindən ilham aldıqlarını bildiriblər. Yeni üsula əsasən, süni intellekt modeli real məlumatlarla təlimə başlamazdan əvvəl təsadüfi “səs-küy” məlumatları ilə qısa ilkin mərhələdən keçirilir. Bu proses modelin öz qeyri-müəyyənliyini daha yaxşı tanımasına kömək edir.
Alimlərin fikrincə, bu yanaşma süni intellektin “hələ heç nə bilmirəm” vəziyyətini öyrənməsinə şərait yaradır. Beləliklə, sistemlər təlim zamanı qarşılaşmadıqları mövzularda yanlış cavab vermək əvəzinə daha ehtiyatlı reaksiya göstərir.
