Arxeoloqlar Son Paleolit dövrünə (təxminən 13 min il əvvəl) aid nadir bir tapıntı üzərində apardıqları analizlər zamanı mavi piqment azurit izlərinə rast gəliblər.
AzEdu.az-ın xarici mediadan əldə etdiyi məlumata görə, bu kəşf, Avropanın erkən sakinlərinin rəng və boyaq maddələrindən istifadə bacarıqları haqqında indiyədək formalaşmış təsəvvürləri yenidən qiymətləndirməyə səbəb olub.
Tədqiqatçılar bildirirlər ki, azurit o dövrdə son dərəcə çətin əldə edilən və nadir minerallardan biri idi. Onun tapıntı üzərində müəyyən edilməsi, paleolit dövr insanlarının təbiətdə rast gəldikləri mineralları tanımaq, toplamaq və xüsusi məqsədlər üçün emal etmək bacarığına sahib olduqlarını göstərir.
Mütəxəssislərin fikrincə, aşkar edilən mavi piqmentin istifadəsi sırf bədii motivlərlə məhdudlaşmaya bilər. O, həm də simvolik, ritual və ya ictimai status kimi anlayışlarla əlaqəli ola bilər. Bu isə həmin dövrün mədəni dinamizmi və estetik duyumunun düşündüyümüzdən daha inkişaf etmiş olduğunu göstərir.
Araşdırmanın müəllifləri kəşfin Avropanın Paleolit dövrü mədəniyyətləri, xüsusilə Magdalen və Epipaleolit icmaları haqqında yeni müzakirələrə yol açdığını vurğulayırlar. Gələcək laborator analizlərinin isə bu piqmentin hansı məqsədlə istifadə olunduğunu daha dəqiq müəyyənləşdirməsi gözlənilir.
