Son araşdırmalar Alzheimer xəstəliyinin qarşısının alınması istiqamətində ümidverici nəticələr ortaya qoyub. Xarici alimlər ilk dəfə tau zülalından ibarət ilkin klasterləri müəyyən edərək onların inkişafını dayandırmaq üçün molekulyar üsullar tətbiq ediblər.
AzEdu.az-ın xarici mediadan əldə etdiyi məlumata görə, bu ilkin klasterlər daha sonra fibrillərə çevrilir və nəticədə Alzheimer xəstəliyinin inkişafına səbəb olur. Klasterlərin “həll edilməsi” ilə bu proses tamamilə əngəllənə bilər.
Alimlərin fikrincə, bu yanaşma Alzheimerin erkən mərhələdə diaqnostikası və müalicəsi üçün yeni perspektivlər açır. Araşdırma həmçinin nevroloji xəstəliklərin molekulyar əsaslarını anlamağa kömək edir və gələcəkdə daha səmərəli dərmanların hazırlanmasına təkan verə bilər.
Ekspertlər onu da vurğulayırlar ki, hələlik nəticələr laboratoriya şərtlərində əldə olunub və klinik sınaqlara ehtiyac var. Buna baxmayaraq, bu tədqiqat Alzheimer xəstəliyi ilə mübarizədə əhəmiyyətli bir addım hesab olunur.
