Rus dilində respublika olimpiadasının 13-cü turu Gəncə şəhərindəki 10 nömrəli ümumtəhsil məktəbində keçirilib.

AzEdu.az AZƏRTAC-a istinadən xəbər verir ki, bu barədə Rusiya İnformasiya və Mədəniyyət Mərkəzinin mətbuat xidmətindən bildirilib. Tədbirdə Gəncə şəhəri, eləcə də Göygöl, Daşkəsən, Samux, Naftalan və Goranboy rayonlarının məktəblərinin 7-9-cu sinif şagirdləri iştirak ediblər.

“Rossotrudniçestvo” təşkilatının Azərbaycandakı nümayəndəliyinin və Bakıdakı Rus evinin rəis müavini Dmitri Yeqorov, Gəncə şəhər Regional Təhsil İdarəsinin inspektoru İlhamə Tağıyeva, 10 nömrəli məktəbin direktoru Arzu Əliyeva olimpiada iştirakçılarını salamlayıblar.

Tədbirdə Bakı Musiqi Akademiyasının məzunu Əminə Əhmədova və məktəb şagirdləri çıxış ediblər.

Olimpiadanın bütün iştirakçılarına sertifikatlar təqdim olunub.

Bu il 16-cısı keçirilən olimpiada Aleksandr Sergeyeviç Puşkinin anadan olmasının 225 illiyinə və Mirzə Şəfi Vazehin anadan olmasının 230 illiyinə həsr olunub.

2024-cü ilin fevral-may aylarında olimpiadanın ikinci mərhələsi Azərbaycanın şəhər və rayonlarında Azərbaycan Respublikasının rus bölməsi olan məktəblərinin 7-9-cu sinif şagirdləri arasında inşa şəklində keçirilir. Olimpiada çərçivəsində təşkilatçılar respublikanın ümumtəhsil müəssisələrinə səfərlərlə regional turlar keçirirlər.

Apreldə başa çatacaq ikinci mərhələyə Bakı, Gəncə, Sumqayıt, Naxçıvan şəhərləri və Azərbaycanın digər 52 rayonundan 2400 min tələbə daxildir. İyun ayında qaliblərin, məktəb direktorlarının və fəal iştirakçıların mükafatlandırılması mərasimi keçiriləcək.

Ənənəvi olaraq, rus dili olimpiadası Azərbaycan Dillər Universitetinin dəstəyi ilə Bakıdakı Rus evi, Rusiya Federasiyasının Azərbaycan Respublikasındakı səfirliyi, Azərbaycan Respublikasının Elm və Təhsil Nazirliyi və Azərbaycanın Rusdilli Təhsil Müəssisələrinin Müəllimləri Assosiasiyası tərəfindən keçirilir.