“2030-cu ilə qədər əsas məqsədimiz yüksək ixtisaslı və savadlı istifadəçilərin sayını artırmaqdır”.
AzEdu.az xəbər verir ki, bu sözləri iqtisadiyyat naziri Mikayıl Cabbarov SABAH.city innovasiya şəhərciyində keçirilən “Baku ID 2026” innovasiya festivalının açılış mərasimində çıxışı zamanı deyib.
Mikayıl Cabbarov çıxışında əmək bazarının dəyişən tələblərindən, texnologiyanın və süni intellektin insan kapitalına təsirindən danışıb.
“Əmək bazarı nöqteyi-nəzərindən yanaşdıqda, düşünürəm ki, bu, bir qədər məhdudlaşdırıcı ola bilər. Xüsusilə nəzərə alsaq ki, auditoriyadakı bir çox insan mütləq iş axtaranlar deyil, daha çox iş yerləri yaradanlardır.
Düşünürəm ki, bu auditoriyanın və “Baku ID” fəlsəfəsinin ən dəyərli tərəfi də elə budur. Bəli, bu gün ilk kiçik 5 illik yubileyinizə doğru irəliləmək böyük bir nailiyyətdir.
Lakin əmək bazarı elementinə qayıtsaq, çox aydındır ki, savadlılığın yeni tərifi texnologiya ilə çox sıx bağlıdır. Texnologiyadan danışanda isə, əlbəttə ki, söhbət süni intellektdən gedir.
Yenə də Azərbaycan nümunəsində düşünürəm ki, dürüst olmalıyıq. Dünyada bu texnologiyanı yaradanlar var, bir də onu mənimsəyənlər var. Düşünürəm ki, 2030-cu ilə qədər əsas məqsədimiz texnoloji dəyişikliyin gətirə biləcəyi imkanları mənimsəyən yüksək ixtisaslı və savadlı istifadəçilərin sayını artırmaqdır.
Emin müəllim, son PISA nəticələri münasibətilə sizi təbrik edirəm. Bu, yalnız klassik oxu, yazı və riyaziyyat bacarıqları deyil", – deyə nazir qeyd edib.
