Cənubi Koreyada alimlər təxminən 300 il əvvəl yaradılmış kral məzarında istifadə olunan daşların haradan gətirildiyini müəyyənləşdiriblər.
AzEdu.az xarici mediaya istinadən xəbər verir ki, araşdırma Çoson sülaləsinin altıncı hökmdarı Kral Danconqun (Danjong) məzarı ilə bağlı uzun illərdir davam edən sirrin açılmasına imkan verib.
Cənubi Koreyanın Milli Mədəni İrs Araşdırma İnstitutunun alimləri tarixi sənədlər, ərazi araşdırmaları və müasir geoloji analizlərdən istifadə edərək məzarda istifadə olunan qranitin Çunqçxonqbuk-do əyalətinin Çeçon şəhərində yerləşən Songhak dağından çıxarıldığını müəyyən ediblər.
Araşdırmaya görə, söhbət Kral Danconqun məzarı olan Cangneung kral məqbərəsinin XVII əsrdə yenilənməsi zamanı istifadə edilən daşlardan gedir. Alimlər məzarı qoruyan daş heykəlləri, qurban masası və digər elementləri laboratoriyada araşdırıblar. Analiz nəticəsində onların eyni xüsusiyyətlərə malik biotit qranitindən hazırlandığı müəyyən olunub.
Daha sonra tədqiqatçılar tarixi mənbələrdəki məlumatları müasir xəritələr və coğrafi məlumatlarla müqayisə ediblər. Sənədlərdə kral məzarının yaxınlığında uyğun daş tapılmadığı və məmurların Jeonqam adlanan ərazidəki karxanaya üz tutduğu qeyd olunub. Bu ərazinin müasir dövrdə Songhak dağının ətəyində yerləşən Siqok-ri olduğu müəyyənləşdirilib.
Geoloji analiz isə tarixi məlumatları təsdiqləyib. Songhak dağından götürülən nümunələrin kral məzarında istifadə olunan biotit qraniti ilə tam uyğun gəldiyi üzə çıxıb. Tarixi mənbədə karxananın məzardan təxminən 24 kilometr məsafədə yerləşdiyi qeyd olunurdu. Müasir hesablamalar da Songhak dağı ilə Cangneung arasındakı məsafənin buna uyğun olduğunu göstərib.
Qeyd edək ki, Kral Danconq 1455-ci ildə hakimiyyətdən uzaqlaşdırılıb və Yeonqvol şəhərinə sürgün edilib. İki il sonra, 16 yaşında ikən zəhər içməyə məcbur edilərək öldürülüb. Onun məzarı isə ölümündən 241 il sonra, 1698-ci ildə kral məqbərəsinə çevrilib.
Alimlər bildiriblər ki, araşdırma tarixi sənədlərlə müasir elmi metodların birləşdirilməsinin əsrlər əvvəlki memarlıq və mədəni irs sirlərinin açılmasına necə imkan verdiyini göstərir. Tədqiqatın tam nəticələrinin bu ilin sonunda elmi jurnalda dərc olunması gözlənilir.
