Alimlər hidrogen bağları olmadan sabit DNT strukturu formalaşdırmağa nail olublar. Bu yenilik molekulyar biologiya və nanoteknologiya sahəsində mühüm irəliləyiş kimi qiymətləndirilir.
AzEdu.az xarici mediaya istinadən xəbər verir ki, araşdırma zamanı tədqiqatçılar ənənəvi DNT modelindən fərqli yanaşma tətbiq edərək molekullar arasında hidrogen bağları olmadan da struktur sabitliyinin mümkün olduğunu sübut ediblər. Məlumdur ki, klassik DNT quruluşunda iki zəncir məhz hidrogen bağları vasitəsilə bir-birinə bağlanır. Yeni metod isə alternativ molekulyar qarşılıqlı təsirlərə əsaslanır.
Alimlərin fikrincə, bu kəşf biotexnologiya, gen mühəndisliyi və süni biomaterialların hazırlanmasında yeni imkanlar aça bilər. Xüsusilə dərman daşıyıcı sistemlərin və nanoölçülü strukturların yaradılmasında tətbiq perspektivləri yüksək qiymətləndirilir.
Tədqiqatın nəticələri göstərir ki, DNT strukturlarının formalaşması ilə bağlı indiyədək qəbul edilən yanaşmalar yenidən nəzərdən keçirilə bilər. Bu isə molekulyar səviyyədə yeni dizayn imkanlarının yaranmasına şərait yaradır.
