Avstraliyalı alimlər antibiotiklərə davamlı olan təhlükəli bakteriyalarla mübarizə aparmaq üçün yeni və perspektivli üsul kəşf ediblər.
AzEdu.az xarici KİV-ə istinadən xəbər verir ki, tədqiqatçılar yalnız bakteriya hüceyrələrində mövcud olan xüsusi bir şəkəri hədəf alan anticisimlər hazırlayıblar, bu anticisimlər immun sistemini aktivləşdirərək infeksiyaların məhv edilməsinə kömək edir.
Nature Chemical Biology jurnalında dərc olunan araşdırmaya görə, laboratoriyada hazırlanmış anticisimlər siçanlar üzərində aparılan sınaqlarda adətən ölümcül olan bakterial infeksiyaları tam aradan qaldırıb. Alimlərin sözlərinə görə, bu yanaşma mövcud antibiotiklərə cavab verməyən xəstəxana mənşəli infeksiyalara qarşı yeni imkanlar yaradır.
Mütəxəssislər hesab edirlər ki, bu kəşf gələcəkdə antibiotiklərə alternativ olan immun əsaslı müalicələrin hazırlanmasına və dərmanlara davamlı bakteriyalarla mübarizədə mühüm rol oynaya bilər.
