İspaniyanın Miguel Hernández Universitetinin mütəxəssisləri, görmə qabiliyyətini itirmiş bir şəxsdə görmənin bir hissəsinin gözlənilməz şəkildə bərpa olunduğunu açıqlayıblar.
AzEdu.az xarici KİV-ə istinadən xəbər verir ki, klinik tədqiqat çərçivəsində, optik siniri geri dönməz dərəcədə zədələnmiş xəstənin görmə korteksinə birbaşa elektrik stimulyasiyası tətbiq edilib.
Əvvəlcə yalnız süni görmə duyğusu yaratmaq məqsədi daşıyan bu müdaxilə prosesində xəstə işıq parıltılarını və hərəkəti hiss etməyə başlayıb. Tədricən inkişaf edən bu hissiyyat nəticəsində o, ətrafındakı obyektlərin mövqelərini müstəqil şəkildə müəyyən etmək bacarığı qazanıb.
Tədqiqatçıların bildirdiyinə görə, görmə qabiliyyətindəki bu irəliləyiş həm uzunmüddətli, həm də spontan xarakter daşıyıb. Ən diqqətçəkən məqam isə odur ki, müsbət effektlər implant beyindən çıxarıldıqdan sonra da davam edib. Ekspertlər bu nəticəni illər sonra belə görmə funksiyasının qismən bərpa oluna biləcəyini göstərən nadir və inqilabi bir elmi tapıntı kimi qiymətləndirirlər.
