İcra hakimiyyəti başçıları rayonların sosial-iqtisadi inkişafında və dövlət siyasətinin yerli səviyyədə icrasında əsas fiqurlardan sayılır. Onların fəaliyyəti əhalinin rifahına, idarəetmədə şəffaflığa birbaşa təsir göstərir. Bu vəzifəni icra edən şəxslərin peşəkar hazırlığı və idarəçilik bacarıqları isə xüsusi əhəmiyyət kəsb edir.
Məhz buna görə də icra başçılarının təhsil və karyera yolu ictimai maraq doğurur.
AzEdu.az Mərkəzi Aran iqtisadi rayonuna daxil olan rayonların icra başçılarının təhsil yolları ilə bağlı yazı hazırlayıb.
Qeyd edək ki, Mərkəzi Aran iqtisadi rayonuna Göyçay, Mingəçevir, Yevlax, Kürdəmir, Ağdaş, Ucar və Zərdab rayonları daxildir.
Göyçay Rayon İcra Hakimiyyətinin başçısı Orxan Çingiz oğlu Mürsəlov
Orxan Mürsəlov 26 iyul 1986-cı il tarixində Rusiya Federasiyasının Bryansk şəhərində anadan olmub. O, 1993-2004-cü illərdə Bakı şəhərindəki 95 saylı tam orta məktəbdə təhsil alıb. Orxan Mürsəlov 2004-2008-ci illərdə Dövlət İdarəçilik Akademiyasının Siyasi idarəetmə fakültəsini politologiya ixtisası üzrə bitirmişdir. O, 2008-2009-cu illərdə Dövlət Sərhəd Xidmətində həqiqi hərbi xidmətdə olmuş, 2010-2012-ci illərdə isə Azərbaycan Dövlət İqtisad Universitetində Biznesin idarəedilməsi marketinq ixtisası üzrə magistr dərəcəsi alıb.
Mingəçevir Şəhər İcra Hakimiyyətinin başçısı İsmayılov İlham Mehdixan oğlu
15.07.1963-cü ildə Ucar şəhərində anadan olub,1986-ci ildə Ç.İldırım adına Azərbaycan Politexnik İnstitutunu fərqlənmə diplomu ilə bitirib, ixtisasca mühəndisdir.
1994-cü ildə Bakı Sosial İdarəetmə və Politologiya İnstitutunu bitirmiş və “Politoloq ali və orta təhsil müəssisələrində sosial-siyasi fənlər müəllimi” ixtisası alıb. 1998-2004-cü illərdə Azərbaycan Respublikası Prezidenti Yanında Dövlət İdarəçilik Akademiyasının dissertantı olmuş, 2004-cü ildə “Azərbaycanda demokratiya təsisatlarının formalaşması xüsusiyyətləri” mövzusunda namizədlik dissertasiyasını müdafiə edərək siyasi elmlər namizədi adını alıb.
Yevlax Şəhər İcra Hakimiyyətinin başçısı Tağıyev Anar Aqil oğlu
25 mart 1981-ci ildə Bakı şəhərində anadan olmuşdur. 1997-ci ildə Bakı şəhəri 1 saylı orta məktəbini, 2001-ci ildə Bakı Dövlət Universitetini, 2005-ci ildə isə Moskva Dövlət Vilayət Universitetini bitirib.
Kürdəmir Rayon İcra Hakimiyyətinin başçısı Həsənli Elşən Nazim oğlu 1986-cı ildə Yevlax şəhərində anadan olub.
2006-cı ildə Azərbaycan Respublikası Prezidenti yanında Dövlət İdarəçilik Akademiyasının “İnzibati idarəetmə” ixtisası üzrə bakalavriatura səviyyəsini, 2019-cu ildə isə Dövlət İdarəçilik Akademiyasının “Davamlı inkişafın planlaşdırılması” üzrə magistratura səviyyəsini bitirib.
Ağdaş Rayon İcra Hakimiyyətinin başçısı Orxan Rüfət oğlu Hüseynzadə 1983-cü ildə Bakı şəhərində anadan olub.
2004-cü ildə Bakı Dövlət Universitetini, 2013-cü ildə Azərbaycan Respublikasının Prezidenti yanında Dövlət İdarəçilik Akademiyasını bitirib.
2023-cü ildən York (İngiltərə) və Strasburq (Fransa) universitetlərində EMBA proqramı üzrə təhsilini davam etdirir.
Ucar Rayonu İcra Hakimiyyətinin başçısı Məmmədov Mənsur Həmzə oğlu 20 aprel 1965-ci ildə Ucar rayonunun Qazıqumlaq kəndində anadan olmuşdur.
1989-cu ildə Azərbaycan Politexnik İnstitutunun mühəndis-texnoloq ixtisası üzrə bitirib.
Zərdab Rayon İcra Hakimiyyətinin başçısı Camalov Mərdan Talıb oğlu 27 may 1956-cı ildə Əli Bayramlı (indiki Şirvan) şəhərində anadan olub.
1973–1978-ci illərdə Azərbaycan Dövlət Pedaqoji İnstitutunun coğrafiya, 1983–1988-ci ildə Azərbaycan Dövlət İqtisadiyyat İnstitutunun iqtisadiyyat fakültəsini bitirib.
