Yeni elmi araşdırma autizmli və autizmli olmayan insanların emosiyalarını üz ifadələri vasitəsilə fərqli şəkildə ifadə etdiyini üzə çıxarıb. Mütəxəssislər bildirir ki, bu fərqlər tərəflər arasında emosional anlaşılmazlıqların əsas səbəblərindən biri ola bilər.
AzEdu.az xəbər verir ki, Böyük Britaniyanın Birmingem Universitetinin tədqiqatçıları tərəfindən aparılan genişmiqyaslı araşdırmada qəzəb, xoşbəxtlik və kədər kimi əsas emosiyaların üz ifadələri ətraflı şəkildə təhlil olunub. Tədqiqat zamanı qabaqcıl üz hərəkəti izləmə texnologiyalarından istifadə edilib və 265 milyondan çox məlumat nöqtəsi toplanıb. Bu da emosional üz hərəkətlərinə dair indiyədək yaradılmış ən geniş məlumat bazalarından biri hesab olunur.
Araşdırmanın nəticələrinə əsasən, autizmli iştirakçılar emosiyalarını ifadə edərkən üzün fərqli hissələrini daha fəal istifadə edir və daha müxtəlif mimikalar nümayiş etdirirlər. Bu ifadələr autizmli olmayan insanlar üçün bəzən qeyri-adi və ya anlaşılmaz görünə bilər. Alimlər vurğulayır ki, bu hal emosiyaların olmaması ilə deyil, fərqli bir “emosional dil”in mövcudluğu ilə izah edilməlidir.
Tədqiqatçılar qeyd edirlər ki, emosional anlaşılmazlıqlara görə məsuliyyət yalnız autizmli insanların üzərinə qoyulmamalıdır. Bu, hər iki tərəfin bir-birinin emosional ifadə tərzini düzgün oxuya bilməməsi ilə bağlı iki tərəfli bir məsələdir.
Mütəxəssislərin fikrincə, bu tip araşdırmalar cəmiyyətdə autizmə dair yanlış təsəvvürlərin azalmasına, eləcə də daha anlayışlı və inklüziv ünsiyyət mühitinin formalaşmasına mühüm töhfə verə bilər.
Zeynəb Tehranlı
