Alimlər Tailanddakı isti su mənbələrində yaşayan sianobakteriyalarda ultrabənövşəyi (UV) şüalardan qoruyan yeni, təbii maddə aşkar ediblər.
AzEdu.az xəbər verir ki, aparılan tədqiqatlara əsasən, aşkar olunan bu birləşmə həm güclü UV-bloklayıcı, həm də antioksidant xüsusiyyətlərə malikdir. Mütəxəssislər hesab edirlər ki, maddə gələcəkdə ekoloji cəhətdən təhlükəsiz günəşdən qoruyucu vasitələrin hazırlanmasında istifadə oluna bilər.
Araşdırma zamanı müəyyən edilib ki, β-qlükoza bağlı hidroksi-mikosporin-sarkozin adlanan bu maddə yalnız bakteriyalar güclü günəş şüalarına və duzlu mühitə məruz qaldıqda sintez olunur. Alimlər onun indiyədək məlum olmayan, unikal biosintez yolu ilə yaranmasını kəşfin əsas üstünlüklərindən biri kimi qiymətləndirirlər.
Mütəxəssislərin sözlərinə görə, yeni birləşmə UV-A və UV-B şüalarını effektiv şəkildə udaraq hüceyrələri qoruyur, eyni zamanda sərbəst radikalları neytrallaşdırmaqla dəri zədələnməsinin qarşısını alır. Bioloji uyğunluğu sayəsində bu maddənin mövcud kimyəvi günəş kremləri ilə müqayisədə insan sağlamlığı və ətraf mühit üçün daha təhlükəsiz olduğu bildirilir.
Alimlər vurğulayırlar ki, bu kəşf “yaşıl texnologiyalar” əsasında yeni nəsil günəşdən qoruyucu və dəriyə qulluq məhsullarının hazırlanmasına mühüm töhfə verə bilər.ı
Zeynəb Tehranlı
