İtaliyanın Siciliya adasında yerləşən Etna Yanardağında vulkanik fəaliyyət yenidən güclənib.
AzEdu.az xəbər verir ki, püskürmə nəticəsində 400 metrə qədər yüksələn lava fəvvarələri, sıx tüstü və qalın kül sütunu müşahidə olunub.
Yanardağın Voragine kraterinin şərq yamacında yeni ventilyasiya bacalarının açıldığı, bu səbəbdən fəaliyyətin davam etdiyi bildirilib. Püskürmə ətraf ərazilərdə görünüş məsafəsini azaldıb, kül emissiyaları isə hava nəqliyyatına risk yaradıb.
Kataniya Beynəlxalq Hava Limanında qırmızı həyəcan rejimi tətbiq olunub. Səlahiyyətli qurumlar vəziyyətin daim nəzarətdə olduğunu, lakin uçuşlarda gecikmələrin mümkün olduğunu açıqlayıb.
Etna, Avropanın ən aktiv yanardağı olaraq son illərdə tez-tez püskürür və bu cür fəaliyyətlər beynəlxalq mediada geniş işıqlandırılır. Sosial şəbəkələrdə lava axınları və tüstü buludları aydın şəkildə yayımlanıb.
Mütəxəssislər bölgədə yaşayan əhali və turistlərə rəsmi xəbərdarlıqlara əməl etməyi tövsiyə edirlər.
Zeynəb Tehranlı
