Kənd Təsərrüfatı Nazirliyi ölkənin ərzaq təhlükəsizliyinin təmin olunması, aqrar sektorun davamlı inkişafı və kənd yerlərinin sosial-iqtisadi potensialının gücləndirilməsi istiqamətində fəaliyyət göstərən əsas dövlət qurumlarından biridir. Bu qurum tərəfindən qəbul edilən strateji qərarların səmərəliliyi isə birbaşa idarəedici heyətin peşəkarlığı, sahə üzrə bilik və təcrübəsi, eləcə də müasir idarəetmə yanaşmalarından istifadə bacarığı ilə bağlıdır.
Nazir müavinlərinin təhsil yolu, ixtisaslaşma sahələri və akademik hazırlığı aqrar sahədə həyata keçirilən islahatların məqsəd və mahiyyətini düzgün dəyərləndirməyə imkan verir. Bu amillər kənd təsərrüfatının idarə olunmasında, innovativ yanaşmaların tətbiqində və ölkənin aqrar siyasətinin formalaşdırılmasında mühüm rol oynayır.
AzEdu.az Təhsil Portalı nazir müavinlərinin təhsil həyatını araşdırır, onların professional hazırlığı barədə ümumi mənzərəni ictimaiyyətə təqdim edir.
Bu yazıda kənd təsərrüfatı naziri Məcnun Məmmədovun müavinləri - İlhamə Qədimova, Elçin Zeynalov və Sarvan Cəfərovun təhsil yolu və akademik fəaliyyətləri barədə məlumat hazırlanıb.
İlhamə Qədimova 1975-ci ildə anadan olub.
1992 Bakı şəhəri 183 nömrəli məktəbin fizika-riyaziyyat-informatika təmayüllü sınaq sinfini bitirib. 1992-1993Ankara Universiteti Türkcə Öyrətim Mərkəzində türk dili və hüquq türkçəsi təhsili alıb. 1993-1997Dövlətlərarası saziş əsasında Türkiyə Respublikasının Ankara və Mərmərə Universitetlərinin Hüquq Fakultəsində bakalavr təhsili alıb. 1998-2001-ci ildə Dövlət hüququ üzrə Mərmərə Universiteti Sosial Elmlər İnstitutunda magistr təhsili alıb.
2002-2009-cu ildə Dövlət vəsaiti hesabına və Prezident təqaüdü ilə Mərmərə Universiteti Sosial Elmlər İnstitutunda doktorantura təhsili alıb və fəlsəfə doktoru elmi dərəcəsini əldə edib. Özəl sektorda 11 il hüquqşünas və konsultant olaraq çalışıb. 2010- 2012-ci ildə Azərbaycan Respublikası Prezidentinin yanında Dövlət Qulluğu Məsələləri üzrə Komissiyanın Hüquq sektorunda mütəxəssis və baş məsləhətçi olaraq fəaliyyət göstərib.
2012-ci ildən etibarən Vəkillər Kollegiyasının üzvüdür. 2012-2018-ci ildə Azərbaycan Respublikası Prezidentinin yanında Vətəndaşlara Xidmət və Sosial İnnovasiyalar üzrə Dövlət Agentliyinin Hüquqi aktların ekspertizası sektorunun müdiri və Hüquqi təminat şöbəsinin müdiri olub.
2018-ci ildə May-sentyabr aylarında Azərbaycan Respublikası Kənd Təsərrüfatı Nazirliyinin Hüquq şöbəsinin müdiri vəzifəsində çalışıb. 2018-ci ildə Azərbaycan Respublikası Prezidentinin 2018-ci il 24 sentyabr tarixli Sərəncamı ilə Kənd Təsərrüfatı nazirinin müavini vəzifəsinə təyin edilib.
Türk, rus və ingilis dillərini bilir.
Elçin Zeynalov 21 sentyabrda Bakı şəhərində anadan olub.
1987-1992-ci ildə Azərbaycan Dövlət Neft Akademiyasının İstehsal proseslərinin avtomatlaşdırılması fakültəsini fərqlənmə diplomu ilə bitirib. 1992-1995-ci ildə Azərbaycan Dövlət Neft Akademiyasında aspirantura üzrə təhsil alıb. 1995-2003-cü ildə Azərbaycan Dövlət Neft Akademiyasında elmi işçi olub. 1998-ci ildə Fəlsəfə doktoru elmi dərəcəsi verilmişdir.
2003-2006-cı ildə Azərbaycan Respublikasının Prezidenti yanında Qiymətli Kağızlar üzrə Dövlət Komitəsində sektor müdiri olub. 2006-200-ci ildə Azərbaycan Respublikası İqtisadi İnkişaf Nazirliyinin Sahibkarlara Kömək Milli Fondunun icraçı direktoru olub. 2007-2009-cu ildə Azərbaycan Dövlət İqtisad Universitetinin Beynəlxalq İqtisadi Münasibətlər ixtisası üzrə təhsil alıb.
2008-ci ildə Azərbaycan Respublikası İqtisadi İnkişaf Nazirliyinin Antiinhisar Dövlət Xidmətinin rəisi vəzifəsində çalışıb. 2010-2013-cü ildə Azərbaycan Respublikası Rabitə və İnformasiya Texnologiyaları Nazirliyinin Strateji planlaşdırma investisiya və elmi potensial şöbəsində məsləhətçi, şöbə müdiri olub. 2014-cü ildə Elmlər doktoru elmi dərəcəsi verilib.
2013-2018-ci ildə Rabitə və İnformasiya Texnologiyaları Nazirliyinin tabeliyində olan İnformasiya Texnologiyalarının İnkişafı Dövlət Fondunun icraçı direktoru olub. 2018-2019-cu ildə Azərbaycan Kənd Təsərrüfatı nazirinin müşaviri, Aqrar Elm və İnnovasiya Mərkəzinin direktoru vəzifəsində çalışıb. Azərbaycan Respublikası Prezidentinin 2019-cu il 9 oktyabr tarixli Sərəncamı ilə Kənd Təsərrüfatı nazirinin müavini vəzifəsinə təyin edilib.
Azərbaycan, rus, ingilis dillərini bilir.
Sarvan Cəfərov 28 oktyabrda anadan olub.
1992-2003-cü illərdə Bakı şəhəri, 178 saylı orta məktəbdə təhsil alıb. 2003-2007-ci illərdə Bakı Dövlət Universitetində Politologiya ixtisası üzrə bakalavr təhsili alıb. Təhsilini fərqlənmə diplomu ilə bitirib. 2007-2008-ci illərdə Hərbi xidmətdə olub.
2008-2010-ci illərdə Milli təhlükəsizlik və siyasi strategiya ixtisası üzrə Bakı Dövlət Universitetində magistr təhsili alıb. Təhsilini fərqlənmə diplomu ilə bitirib. 2009-2012-ci illərdə Əmlak Məsələləri Dövlət Komitəsində məsləhətçi işləyib.
2012-2018-ci illərdə Vətəndaşlara Xidmət və Sosial İnnovasiyalar üzrə Dövlət Agentliyində sədrin köməkçisi vəzifəsində işləyib. 2012-2015-ci illərdə Azərbaycan Dövlət İqtisad Universitetində Biznesin təşkili və idarə olunması (MBA) ixtisası üzrə magistr təhsili alıb.
2007-2015-ci illərdə Azərbaycan gənclərinin xarici ölkələrdə təhsili üzrə” Dövlət Proqramı çərçivəsində Avstriyada yerləşən Beynəlxalq Anti Korrupsiya Akademiyasında magistr təhsili alıb. 2020-ci ildə Kənd Təsərrüfatı Nazirliyinin tabeliyində olan Aqrar Tədqiqatlar Mərkəzinin doktorantıdır.
2018-ci ilin Aprel ayından 2019-cu ilin noyabr ayına qədər Kənd Təsərrüfatı Nazirliyində nazirin köməkçisi olub. 2019-cu ilin Noyabr ayından 2020-ci ilin mart ayına kimi nazirin müşaviri vəzifəsində işləyib. 2020-ci ilin Mart ayından iyul ayına kimi Kənd Təsərrüfatı Nazirliyində Aparat rəhbəri vəzifəsində işləyib.
Azərbaycan Respublikası Prezidentinin 2020-ci il 30 iyul tarixli Sərəncamı ilə Kənd Təsərrüfatı nazirinin müavini vəzifəsinə təyin edilib.
İngilis və Rus dillərini bilir.
