https://www.zirve.edu.az/
15.02.2020 11:01
UNEC Rusiyanın İqtisadi Siyasət İnstitutu ilə əməkdaşlıq edəcək
Çap et

Azərbaycan Dövlət İqtisad Universiteti (UNEC) və elmi-iqtisadi araşdırmaları ilə dünyada məşhur olan “E.T.Qaydar adına İqtisadi Siyasət İnstitutu” Fondu arasında elmi əməkdaşlıq haqqında razılaşma əldə olunub.

AzEdu.az xəbər verir ki, razılaşma müqaviləsini UNEC  rektoru,  professor Ədalət .Muradov və “E.T.Qaydar adına İqtisadi Siyasət İnstitutu” Fondunun icraçı direktoru, professor S.V.Prixodko imzalayıblar.

Sənədə əsasən, UNEC və “E.T.Qaydar adına İqtisadi Siyasət İnstitutu” Fondu elmi əməkdaşlıq proqramını həyata keçirəcək. Proqram fundamental tədqiqatların bütün əsas istiqamətlərini, o cümlədən,  humanitar, ictimai və iqtisadi elmləri əhatə edir. Proqramda Azərbaycan və Rusiya alimlərinin apardıqları birgə elmi-tədqiqat layihələri, seminarlar, simpoziumlar və digər elmi tədbirlərin, onların yekun razılaşdırılması üçün hazırlıq səfərlərinin dəstəklənməsi və digər qarşılıqlı razılaşdırılmış birgə fəaliyyətin daxil edilməsi nəzərdə tutulur.