Çexiya 2027-ci ildən məktəblərdə mobil telefonları qadağan etməyi planlaşdırır.
AzEdu.az-ın xarici mediadan əldə etdiyi məlumata görə, Çexiya hökuməti məktəb mühitində diqqətin artırılması və şagirdlərin sosial ünsiyyətinin gücləndirilməsi məqsədilə yeni qanun layihəsi hazırlayıb. Layihəyə əsasən, 2027-ci il sentyabrın 1-dən etibarən uşaq bağçalarında, ibtidai və aşağı orta məktəblərdə mobil telefonlardan istifadə qadağan ediləcək.
Qadağa yalnız dərs saatlarına deyil, həm də tənəffüslərə, məktəb yeməkxanalarına və məktəb ərazisində keçirilən könüllü fəaliyyətlərə şamil olunacaq. Bununla belə, telefonlardan tibbi səbəblərlə və ya tədris prosesinin bir hissəsi kimi istifadə edilməsinə icazə veriləcək.
Hökumət bildirir ki, bu addım şagirdlərin dərsə daha yaxşı fokuslanmasına, kiberzorakılığın azalmasına və məktəbdə canlı ünsiyyətin artmasına kömək edə bilər. Qanun layihəsi parlament tərəfindən təsdiqlənərsə, yeni qaydalar 2027-ci ildən qüvvəyə minəcək.
