Bakı Qızlar Universitetinin fəaliyyətinin dayandırılması fonunda özəl ali təhsil müəssisələrinə ictimai etimadın gələcəyi ilə bağlı da suallar yaranır.
Bu qərarın digər özəl universitetlərə olan etimada təsir göstərəcəyi gözlənilirmi?
Mövzu ilə bağlı AzEdu.az-a açıqlama verən təhsil mütəxəssisi Əlmusa Atamaliyev qeyd edib ki, Bakı Qızlar Universitetinin fəaliyyətinin dayandırılması ilə bağlı qərarı bütövlükdə özəl ali təhsil sektoruna verilmiş qiymət kimi qəbul etmək doğru olmaz:
"Bu, konkret bir ali təhsil müəssisəsinin qanunvericilik və keyfiyyət tələbləri çərçivəsində qiymətləndirilməsi nəticəsində qəbul edilmiş qərardır.
İctimai etimad hər zaman institutlara deyil, onların fəaliyyət keyfiyyətinə əsaslanır. Bu baxımdan hesab edirəm ki, qısa müddətdə bəzi abituriyentlər və valideynlər arasında narahatlıq və tərəddüd yarana bilər. Xüsusilə universitet seçimi ərəfəsində olan ailələr daha ehtiyatlı davranacaq, özəl ali məktəblər haqqında daha çox məlumat toplamağa çalışacaqlar. Bu isə tamamilə təbii reaksiyadır.
Lakin uzunmüddətli perspektivdə etimadın taleyini universitetin dövlət və ya özəl olması deyil, təqdim etdiyi təhsilin keyfiyyəti müəyyən edəcək. Bu gün əmək bazarında uğur qazanan məzunlar, beynəlxalq əməkdaşlıqlar, akkreditasiya nəticələri, elmi fəaliyyət, müasir infrastruktur və şəffaf idarəetmə sistemi universitetin nüfuzunu formalaşdıran əsas amillərdir".
Həmçinin bu hadisə özəl ali təhsil müəssisələri üçün də müəyyən mesaj xarakteri daşıyır:
"Təhsil sektorunda fəaliyyət göstərən hər bir universitet keyfiyyət təminatı mexanizmlərini daha da gücləndirməli, akademik mühiti inkişaf etdirməli və cəmiyyətlə açıq kommunikasiyanı artırmalıdır. Çünki müasir dövrdə etimad reklamla deyil, real nəticələrlə qazanılır.
Abituriyentlərə və valideynlərə tövsiyəm odur ki, universitet seçərkən emosional yanaşmadan uzaq dursunlar. Ali məktəbin akkreditasiya statusunu, professor-müəllim heyətini, təhsil proqramlarını, məzunlarının məşğulluq göstəricilərini, beynəlxalq əlaqələrini və əmək bazarındakı nüfuzunu araşdırsınlar. Düzgün seçim yalnız obyektiv meyarlar əsasında verilən qərarla mümkündür.
Hesab edirəm ki, bu hadisə özəl ali təhsilə etimadı zəiflətməkdən daha çox, keyfiyyətə əsaslanan rəqabəti gücləndirəcək. Güclü universitetlər bu prosesdən daha da güclənərək çıxacaq, zəif idarə olunan ali təhsil müəssisələri isə fəaliyyətlərini yenidən nəzərdən keçirmək məcburiyyətində qalacaqlar. Çünki ali təhsildə etimad statusla deyil, standartlarla qazanılır".
