Artıq II və III ixtisas qrupunu seçən abituriyentlər topladıqları ümumi balı bilirlər və ixtisas seçimi barədə düşünməyə başlayıblar.
Lakin bir çox məzunun fikirləri hələ də qarışıqdır və onlar hansı ixtisasa üstünlük verəcəklərinə qərar verə bilmirlər. Abituriyentləri ən çox maraqlandıran məsələlərdən biri də III ixtisas qrupu üzrə hansı sahələrin daha perspektivli olmasıdır.
Maraqlıdır, əmək bazarında daha çox tələbat görən, gələcəkdə iş imkanları geniş olan və məzunlarına daha yüksək karyera perspektivi vəd edən ixtisaslar hansılardır?
AzEdu.az-a mövzu ilə bağlı açıqlama verən təhsil eksperti Elçin Əfəndi qeyd edib ki, II cəhd üçün qeydiyyatdan keçənlərin sayı göstərir ki, nəticələr yaxşılaşarsa, müsabiqə yenə də gərgin olacaq:
"24 may tarixində keçirilmiş imtahanın nəticələrində maksimum nəticə göstərən 4 abituriyent var. Bununla yanaşı, yüksək bal toplayan, yəni 300 baldan yuxarı nəticə əldə edən abituriyentlərin sayı da kifayət qədər çoxdur.
Ümumilikdə, əlbəttə ki, bunlar hələ ilk cəhdin nəticələridir. Biz II cəhddən sonra vəziyyətin dəyişəcəyini də proqnozlaşdırırıq. Çünki III ixtisas qrupu üzrə birinci cəhddə 28 min nəfər iştirak etmişdisə, onların təxminən 23 min nəfəri II cəhd üçün qeydiyyatdan keçib. Eyni zamanda, II ixtisas qrupunda 28 min 500-dən çox iştirakçı var idisə, onların da, səhv etmirəmsə, təxminən 20 min nəfəri II cəhddə iştirak etmək üçün qeydiyyatdan keçib.
Təbii ki, bu iştirakçıların sayı faktiki plan yerlərinin sayından daha çoxdur və bu da onu deməyə əsas verir ki, onlar II cəhddə nəticələrini yaxşılaşdıra bilsələr, müsabiqə yenə də gərgin olacaq".
Ekspert bildirib ki, II qrup abituriyentləri seçim edərkən əmək bazarının tələblərini nəzərə almalıdırlar:
"Əmək bazarında hər iki ixtisas qrupu üzrə perspektiv vəd edən ixtisaslara gəldikdə, II ixtisas qrupunda abituriyentlər, təbii ki, diqqətli olmalıdırlar. Burada əmək bazarında hazırda daha çox maliyyə, marketinq və iqtisadiyyat ixtisaslarına tələbat müşahidə olunur.
Daha sonrakı sıralarda isə menecment və biznesin idarə olunması kimi ixtisaslar yer alır. Bu ixtisaslara da tələbat var. Həmçinin beynəlxalq ticarət, logistika və digər əlaqəli ixtisaslar da perspektivli istiqamətlər sırasındadır".
Pedaqoji ixtisaslara tələbat olsa da, bu sahədə kadr hazırlığı çox olduğundan məzunların bir qismi iş tapmaqda çətinlik çəkir:
"III ixtisas qrupuna gəldikdə isə, burada əsas üstünlük hüquq ixtisası istiqamətinə verilir. Sonrakı sıralarda tərcümə yönümlü ixtisaslar yer alır. Xüsusilə Çin, Koreya və İspan dilləri üzrə tərcümə ixtisasları, eləcə də pedaqoji ixtisaslar, dövlət və ictimai münasibətlər kimi istiqamətlər qeyd oluna bilər.
Lakin əmək bazarında ən yüksək tələbat yenə də hüquq ixtisasına müşahidə olunur. Pedaqoji ixtisaslara da tələbat var, amma bu sahə üzrə çox sayda kadr hazırlanır. Kadr hazırlığı üçün ayrılan plan yerlərinin sayı kifayət qədər çoxdur və hazırda pedaqoji təhsil almış on minlərlə şəxs iş tapmaqda müəyyən çətinliklərlə üzləşib. Buna görə də gələcək perspektiv baxımından pedaqoji ixtisaslara o qədər də üstünlük vermirəm.
Tərcümə yönümlü ixtisaslara gəlincə, əmək bazarında xüsusilə Çin, Koreya, Yaponiya, İspan və erməni dilləri üzrə mütəxəssislərə tələbat müşahidə olunur. Bu sahələr üzrə ixtisaslaşan məzunlara ehtiyac var. Buna görə də III ixtisas qrupu üzrə seçim edən abituriyentlər bu istiqamətlərə üstünlük versələr, daha məqsədəuyğun olar".
