Ali təhsil müəssisələrində uzunmüddətli fəaliyyət göstərən əməkdaşlar universitetlərin akademik və inzibati sabitliyinin formalaşmasında mühüm rol oynayırlar. Onların illərlə davam edən fəaliyyəti tədrisin keyfiyyətinə, institusional yaddaşın qorunmasına və elmi-pedaqoji mühitin inkişafına ciddi töhfə verir.
Maraqlıdır, ali təhsil müəssisələrində ən çox uzun müddət fəaliyyət göstərən müəllim-professor heyəti nə qədərdir?
Mövzu ilə bağlı AzEdu.az Təhsil Portalı ali təhsil müəssisələrinə sorğu ünvanlayıb.
Sorğumuza cavab olaraq Azərbaycan Universitetindən (AU) bildirilib ki, uzunmüddətli fəaliyyət göstərən əməkdaşların sayı 44 nəfərdir:
“Ən uzun müddət çalışan əməkdaşın stajı 34 ildir. Bu əməkdaşlar əsasən pedaqoji vəzifələrdə çalışırlar. Təqaüd yaşına çatmış, lakin fəaliyyətini davam etdirən əməkdaşların sayı 33 nəfərdir. Universitet bu əməkdaşların töhfələrini yüksək qiymətləndirir və onları yubiley illərində, eləcə də müxtəlif rəsmi tədbirlərdə təşəkkürnamə, fəxri fərman və digər stimullaşdırıcı vasitələrlə mükafatlandırır".
Azərbaycan Dövlət Pedaqoji Universitetindən (ADPU) aldığımızı məlumata əsasən, universitetdə 30 ildən artıq fasiləsiz əmək fəaliyyəti göstərən əməkdaşların sayı 220 nəfər təşkil edir:
“Ən uzunmüddətli əmək stajı 59 ildir. Təqaüd yaşına çatmış əməkdaşların sayı isə 262 nəfərdir. Bu əməkdaşlar müxtəlif dövlət təltifləri, fəxri adlar və universitet mükafatları ilə qiymətləndirilirlər”.
Azərbaycan Texniki Universitetindən (AzTU) qeyd edilib ki, 40 ildən çoxdur universitetdə çalışan 48 nəfər əməkdaş mövcuddur:
“Onlardan 3-4 nəfərin iş təcrübəsi 39 ildir. Bu əməkdaşların hamısı pedaqoji heyətə daxildir və onlar yubiley və səmərəli fəaliyyətlərinə görə mütəmadi olaraq mükafatlandırılırlar”.
Azərbaycan Dillər Universitetindən (ADU) verilən məlumata görə, uzun müddət işləyən 57 nəfər əməkdaş vardır:
“Onlardan 51-i professor-müəllim, 6-sı inzibati işçidir. Ən yüksək iş stajı 61 ildir. Bu əməkdaşlara pul mükafatı verilir və yubiley günləri qeyd olunur”.
Xəzər Universitetindən bildirilib ki, 30-35 il Xəzər Universitetində işləyən və hazırda fəaliyyətini davam etdirən 10 professor-müəllim və 11 inzibati işçi var:
“20 ildən çox çalışan professor-müəllim heyəti 27 nəfər, inzibati işçi heyəti isə 57 nəfərdir”.
Bakı Avrasiya Universitetindən (BAAU) qeyd edilib ki, Qafar Verdiyev 30 il, Nərgiz Həsənova 1995-ci ildən, Rüxsarə Məmmədova 1993-cü ildən fəaliyyət göstərir:
“Ədalət Tahirzadə 28 ildir professor vəzifəsində çalışır. Nazim Hüseynli 1992-ci ildən 2025-ci ilə qədər rektor vəzifəsində fəaliyyət göstərib”.
