Dünyanın bir çox yerində artıq “təhsilin yaşı yoxdur” fikri yalnız motivasiya cümləsi deyil, sosial reallıqdır. Həyatın qayğıları, ailə məsuliyyətləri və illərlə qurulmuş karyeradan sonra bir çox insan yenidən auditoriyalara qayıdır. Bu insanlar artıq gənc deyil, lakin içlərində sönməyən bir öyrənmə arzusu yaşayır. 40 yaşını keçmiş minlərlə insan ali təhsilə qayıtmaqla öz hekayələrini yenidən yazır.
AzEdu.az məsələylə bağlı apardığı araşdırmanı təqdim edir:
“Son illərin statistikası göstərir ki, bu tendensiya təkcə fərdi seçim deyil, həm də sosial zərurətə çevrilməkdədir. Məsələn, 2023-cü ilin məlumatına görə ABŞ-də bakalavr pilləsində oxuyan tələbələrin təxminən 13 faizi 40 yaşdan yuxarı şəxslər olub. Bu yaş qrupunda təhsil alanların ümumi sayı isə bir milyonu keçib. Böyük Britaniyada açıq təhsil modelində təhsil alan yetkinlərin 15 faizini 40 yaşdan yuxarı tələbələr təşkil edir. Avstraliyada bu göstərici 11 faiz civarındadır. Kanadada isə universitetlərdə qeydiyyatda olan tələbələrin təxminən 9 faizi 40 yaşdan yuxarı şəxslərdir. UNESCO və OECD kimi beynəlxalq təşkilatların hesablamalarına görə, dünya üzrə ali təhsildə 40 yaşdan yuxarı şəxslərin payı 7 ilə 12 faiz arasında dəyişir. Bu, kifayət qədər əhəmiyyətli göstəricidir və burada yüksələn dinamika müşahidə olunur.
Amma bu yol asan deyil. 40 yaşdan sonra təhsilə başlamaq həm zehni, həm də sosial mənada çətinliklər yarada bilər. Texnologiya ilə aradakı məsafə, ailə-iş-təhsil balansının qorunması bu insanların qarşısına çıxan əsas problemlərdəndir. Bununla belə, təhsilə dönənlərin motivasiyası bu maneələri aşmağa kifayət edir. Onlar nə üçün oxuduqlarını, nə istədiklərini və bu seçimin nə qədər mühüm bir qərar olduğunu yaxşı bilirlər.
Bir çox ölkələr bu qrup üçün xüsusi dəstək proqramları hazırlayır. Məsələn, Skandinaviya ölkələrində yaşlı tələbələr üçün təhsil haqlarında güzəştlər, xüsusi mentorluq sistemləri və çevik dərs cədvəlləri təklif olunur. Almaniya, Niderland kimi ölkələrdə yaşlı tələbə anlayışı artıq normal qəbul edilir və bu cür insanlar auditoriyalarda heyrətlə deyil, hörmətlə qarşılanır.
Təhsil üçün yaş artıq sadəcə bir rəqəmdir. Öyrənmək isə hər zaman qüvvədədir”.
