Lənkəran Dövlət Universitetində (LDU) Azərbaycan Respublikası Prezidentinin 27 iyul 2020-ci il tarixli Sərəncamı ilə təsdiq edilmiş “Su ehtiyatlarından səmərəli istifadənin təmin edilməsinə dair 2023-cü il üçün Tədbirlər Planı”nın icrası ilə əlaqədar tələbələr üçün maarifləndirici seminar keçirilib.

Bu barədə universitetdən AzEdu.az-a məlumat verilib.

Bildirilib ki, seminarı Təbiyyat fakültəsinin dekanı Ramiz Şəmmədov açıb və sərəncamdan irəli gələn vəzifələr, bu istiqamətdə ölkədə və LDU-da aparılan profilaktiki tədbirlərdən danışıb. Ramiz Şəmmədov su ehtiyatlarından səmərəli istifadəni bəşəriyyətin ən qlobal problemi kimi dəyərləndirib, cəmiyyətin bu istiqamətdə maarifləndirilməsinin vacibliyini qeyd edib.

Seminarda “Ekologiya” I tədris ili tələbələri Aytac Quluzadə və Nəzirə Əliyevanın “Azərbaycanın su ehtiyatlarının qorunması” mövzusunda məruzələri dinlənilib. Sonda tədbir iştirakçılarını maraqlandıran suallar cavablandırılıb.