İyulun 18-də Azərbaycan Dövlət Neft və Sənaye Universitetinin (ADNSU) rektoru, professor Mustafa Babanlı Fransanın Strasburq Universitetində təşkil olunan Yay məktəbində iştirak etmiş Azərbaycan-Fransız Universitetinin (UFAZ) tələbələri ilə görüşüb.

AzEdu.az xəbər verir ki, tələbələri salamlayan rektor Yay məktəbinin uğurla başa çatması münasibətilə onları təbrik edib. Professor M. Babanlı 2 həftə ərzində Strasburq universitetində fransız dili dərsləri ilə yanaşı müxtəlif elmi laboratoriyalarla tanışlığın onlara əlavə motivasiya verəcəyini və bundan sonar da səylə çalışacaqlarına ümid etdiyini bildirib.

 UFAZ-ın İcraçı direktoru Vazeh Əskərov Yay məktəbinin təşkili və gedişatı ilə bağlı çıxışında bildirib ki, Strasburq universitetinin Prezidenti Michel Deneken tələbələrlə görüşdə onların hazırlıq səviyyəsindən çox məmnun qalıb. Tələbələr yer elmləri, geofizika, kimya üzrə müxtəlif laboratoriyalarda olublar. Bundan əlavə Strasburq universitetinin professoru Pierre Collet “21-ci əsrdə süni intellektin doğura biləcəyi etik problemlər” mövzusunda mühazirə ilə tələbələr üçün çıxış edib. Daha sonra tələbələr səfərlə bağlı öz təəssüratlarını bölüşüblər.

 Qeyd edək ki, ümumilikdə 46 nəfər UFAZ tələbəsi iyulun 3-dən 17-dək Fransanın Strasburq Universitetində təşkil olunan Yay məktəbində iştirak edib. Yay məktəbinin proqramına gündəlik fransız dili kursları və danışıq klubları, eyni zamanda Strasburq Universitetinin elmi-tədris laboratoriyalarında dərslər daxil olub. Proqramın mədəni hissəsində tələbələr yerli muzeylər və Strasburqun mədəni-tarixi obyektlərinə baş çəkiblər. Yay məktəbində iştirak edən tələbələr təhsil müddətində akademik göstəricilərinə görə seçilirlər.