“Yay imtahan sessiyasında iştirak edəcək abituriyentlərin sayının yaz sessiyasında iştirak edəcəklərin sayından az olması təhlükəli haldır”

Bu sözləri AzEdu.az-a açıqlamasında təhsil eksperti Kamran Əsədov deyib. Onun sözlərinə görə,  yaz imtahan sessiyasında iştirak etmək istəyənlərin sayı 69698 abituriyent idisə, hazırda yay imtahan sessiyasında bu rəqəm 57590 nəfər təşkil edir:

“Nəzərə alsaq ki, yaz sessiyasında iştirak edən şəxslərin 50 faizə qədəri keçid balını toplaya bilməyib, bu o deməkdir ki, universitetlərə qəbul üçün ayrılan 45 min plan yerlərinin böyük hissəsi boş qala bilər. Ona görə də, DİM yay imtahan sessiyasında iştirak edən şəxslərin sayının artması üçün qeydiyyat vaxtını uzadıb. Son illər ərzində ali məktəblərə qəbul imtahanlarında iştirak etmək istəyən abituriyentlərin sayı ciddi şəkildə azalıb. Bu da yekun nəticədə universitetlərə zərər verir.

Yay imtahan sessiyasında iştirak edəcək abituriyentlərin sayının yaz sessiyasında iştirak edəcəklərin sayından az olması təhlükəli haldır. DİM bu zaman müsabiqə şərtlərini dəyişəcək”

Qeyd edək ki,ali təhsil müəssisələrinə və tam orta təhsil bazasında orta ixtisas təhsili müəssisələrinə ərizə qəbulunun vaxtı 20 iyun saat 10:00-dək uzadılıb.