Xarici  ölkələrdə təhsil almaq istər dünyagörüşünün formalaşması, istərsə də elm, təhsil baxımından böyük əhəmiyyət kəsb edir.

Maraqlıdır, bəs xaricdə təhsil alan tələbələrimiz oxuduqları ölkələrdə ictimai fəallığı, Azərbaycanı təbliğetmə aktivlikləri necədi?

AzEdu.az bununla bağlı xaricdə təhsil üzrə ekspertlərin fikrini öyrənib:

“Azərbaycanlı tələbələr heç bir xarici ölkələrdə sosial  fəallıq göstərmirlər”

Bu sözləri xaricdə təhsil üzrə mütəxəssis Həsən Əliyev deyib. Onun sözlərinə görə, Macarıstan və Türkiyədə təhsil alan tələbələrimiz bu yöndə nisbətən fəaldırlar:

“Orta məktəblərimizdə təhsil alan şagirdlərimiz aktiv olmadıqlarından sonradan oxumağa getdikləri xarici ölkələrdə bu istiqamətdəki passivlik davam edir.

Onu da  bildirim ki, Polşada təhsil alan tələbələrimizin də sosial aktivliyi o birilərinə nisbətdə çoxdur.

Fikrimcə, şagirdlər  ilk növbədə  orta məktəbdə sosial fəal olmağı öyrənməlidirlər. Xaricdə təhsil alan bəzi tələbələr var ki, universitetin karyera mərkəzinin nə demək olduğunu da bilmirlər. Hətta xaricdə təhsil alan bəzi tələbələr “Erasmus”, “Foundation” nə demək olduğunu da anlamırlar. Bəziləri  adicə sual verməyə də utanırlar. Onu da bildirim ki, Qarabağ həqiqətlərinin dünyaya çatdırılmasında Türkiyədə təhsil alan tələbələrimiz  daha çox aktivdirlər.

Xaricdə təhsil üzrə ekspert Fuad Hacıyevin sözlərinə görə, azərbaycanlı tələbələr xarici ölkələrdə heç sosial aktiv deyillər:

“Azərbaycanlı tələbələr daha çox Türkiyə, İtaliya, Ukrayna, Macarıstan, İngiltərə, Amerika kimi ölkələrdə sosial aktivdirlər. Amma azərbaycanlı tələbələr istənilən səviyyədə xarici ölkələrdə aktiv deyillər. Xaricdə təhsil alan tələbələrimizin sosial aktivliyi üçün vahid nəzarət qrupu yaradılsa yaxşı olar.  Onu da bildirim ki, azərbaycanlı tələbələr son zamanlar Pribaltika ölkələrində də sosial aktivlik göstərirlər”.

 Türkiyədə təhsil üzrə mütəxəssis Rəşad Abbasov da bildirib ki, xarici ölkədə azərbaycanlı tələbələrin sosial aktivliyi  sayca azlıq təşkil edir:

“Türkiyədə tələbələrin sosial aktiv olması üçün çox gözəl şərait mövcuddur. Amma təəssüf ki, sosial aktiv azərbaycanlı tələbələrin sayı azdır”.