27-30 noyabr 2023-cü il tarixlərində ABŞ-nin Nyu-York şəhərində Birləşmiş Millətlər Təşkilatının Beynəlxalq Dövlət Qulluğu Komissiyası və Dövlət Qulluğu üzrə Astana Regional Xabın birgə təşkilatçılığı ilə “XXI əsrdə dövlət qulluğunda nailiyyət əsaslı insan resurslarının idarə edilməsi” mövzusunda beynəlxalq seminar keçirilib. Xatırladaq ki, bu mövzuda “Bacarıqların inkişafı” üzrə keçirilən ilk seminar 20-21 dekabr 2022-ci il tarixlərində Bakı şəhərində təşkil olunmuşdu.

Bu barədə DİM-dən AzEdu.az-a məlumat verilib.

Bildirilib ki, tədbirdə BMT nümayəndələri ilə yanaşı, Xaba üzv olan Gürcüstan, Qazaxıstan, Qırğızıstan, Tacikistan və Özbəkistanın dövlət qulluğu orqanlarının rəhbər şəxsləri, dövlət sektorunda insan resurslarının idarə edilməsi siyasətinin formalaşdırılması və həyata keçirilməsinə cavabdeh olan dövlət qurumlarının nümayəndələri iştirak ediblər.

Seminarın məqsədi müasir insan resurslarının idarə edilməsində dövlət qulluğu sistemi komponentlərinin – işə qəbul, seçim və saxlama siyasəti, motivasiya, əmək haqqı, resursların idarə olunmasının texniki apektləri və s. mövzuların müzakirəsi, həmçinin iştirakçı ölkələrin qabaqcıl təcrübələrinin paylaşılması olub.

Seminarın açılışını edən BMT-nin Beynəlxalq Dövlət Qulluğu Komissiyasının sədri Larbi Djacta və Dövlət Qulluğu üzrə Astana Regional Xabın Rəhbər Komitəsinin sədri Alixan Baimenov insan resurslarının idarəedilməsi ilə bağlı müasir çağırışlara toxunublar.

Seminarda Dövlət İmtahan Mərkəzinin Direktorlar Şurasının sədr müavini Bəhram Xəlilov da iştirak edib. B.Xəlilov öz çıxışında Azərbaycanın dövlət qulluğu sistemində aparılan islahatlar barədə danışıb və iştirakçılara “Azərbaycan Respublikasında dövlət qulluğunun inkişafına dair 2019−2025-ci illər üçün Strategiya”, “Dövlət qulluğunda səriştə modeli”nin tətbiqi, Dövlət Qulluğu Məcəlləsinin hazırlanması və insan resurslarının inkişafı ilə əlaqədar görülən işlər haqqında məlumat verib.

Məlumat üçün bildiririk ki, seminar iştirakçılarının növbəti görüşünün 2024-cü ilin yay aylarında yenidən Bakı şəhərində keçirilməsi nəzərdə tutulur.

Qeyd edək ki, tədbirin təşkilatçılarından olan BMT-nin Beynəlxalq Dövlət Qulluğu Komissiyası 1974-cü ildə BMT-nin Baş Assambleyası tərəfindən yaradılmış müstəqil ekspertiza orqanıdır.

Dövlət Qulluğu üzrə Astana Regional Xab isə 25 iştirakçı ölkə və 5 beynəlxalq təşkilat tərəfindən yaradılan effektiv tərəfdaşlıq və şəbəkə platforması nümunəsidir. Hazırda Xabın şəbəkəsində olan 42 ölkə arasında qarşılıqlı öyrənməyə əsaslanan üfüqi bilik mübadiləsi həyata keçirilir.