Son günlərin gündəmdən düşməyən mövzularından biri paytaxtın Sabunçu rayonunda yerləşən 90 nömrəli tam orta məktəbdə 2-ci sinif şagirdinin xəsarət alması ilə bağlı informasiyalardır.

Məktəbli qız üz nahiyyəsindən güclü zərbə almasına baxmayaraq, ona ilkin tibbi yardım göstərilmədiyi qeyd edilir.

Mövzu ilə bağlı AzEdu.az-a açıqlama verən təhsil eksperti Elçin Əfəndi qeyd edib ki, məktəblərdə tibbi xidmət göstərilməsi ilə bağlı çatışmayan məqamlar mövcuddur:

“Son günlər məktəblərdə baş verən hadisələrdən yola çıxaraq qeyd edə bilərəm ki, təhsil ocaqlarında müəllim-şagird-valideyn münasibətlərində müvafiq problemlər var. 90 nömrəli tam orta məktəbdə baş verənlərdən sonra müşahidə etdiyim məqamlardan biri, bu ümumtəhsil müəssisəsində ilkin tibbi yardımla bağlı çatışmayan məqamların olması idi.

Halbuki, Nazirlər Kabinetinin 25 noyabr 2010-ci il tarixli qərarında “Təhsil müəssisəsində təhsilalanlara pulsuz tibbi xidmətin göstərilməsi Qaydası” təsdiq olunub. Tibbi xidmətin təşkili ilə bağlı xüsusi olaraq qeyd olunur ki, mülkiyyət forması və tabeliyindən asılı olmayaraq bütün təhsil müəssisələrində təhsilalanların tibbi xidmətlə təmin olunması vacibdir”.

Ekspert qeyd edib ki, təhsil müəssisələrində amblator tibbi xidmətin təşkili üçün məntəqələr yaradılmalıdır:

“Bunun üçün də müvafiq olaraq təhsil müəssisəsi ilə həmin xidməti göstərəcək poliklinika arasında razılaşma olmalıdır. Amma təəssüflər olsun ki, bu gün məktəblərdə sırf amblator müalicə və ilkin tibbi xidmətin göstərilməsi ilə bağlı fəaliyyət qismən işlək vəziyyətdədir. Hətta yox səviyyəsində olduğunu da vurğulaya bilərik.

Azərbaycanda 4200 dən çox təhsil müəssisəsi mövcuddur və burada 1 milyon 6 yüzdən çox şagird təhsil alır. Nəzərə alsaq ki, bu şagirdlərin böyük əksəriyyəti bölgə məktəblərində təhsil alır. Bu gün haqqında bəhs edilən hadisə paytaxt məktəbində baş verib və ilkin yardım göstərilməyibsə, bölgə məktəblərindəki vəziyyəti təssəvvür etmək heç də çətin deyil... “

Müsahibimiz vurğulayıb ki, məktəblərdə çalışan hər bir tibb işçisi öz vəzifələrini bilməlidir:

“Ümumi olaraq ümumtəhsil müəssisələrində mütləq şəkildə tibb məntəqələri mövcud olmalıdır. Əgər hansısa ümumtəhsil müəssisəsində yoxdursa, Səhiyyə Nazirliyi ilə Elm və Təhsil Nazirliyinin razılığı əsasında həmin ərazilərdə, məntəqə yaradılmalıdır".