XƏBƏRLƏR

08.11.2018 21:44
Gənc alimlər beynəlxalq konfransda

Bakı Dövlət Universitetinin (BDU) fizika fakültəsinin əməkdaşları Rusiya Federasiyasının Dubna şəhərində gənc tədqiqatçıların “Eksperimental nüvə fizikasının qurğu və metodları” adlı IX beynəlxalq payız məktəbində iştirak ediblər.   BDU-dan AzEdu.az-a verilən məlumata görə, universitetin Nanoaraşdırmalar Mərkəzinin kiçik elmi işçiləri Həbibə Şirinova, Kənan Hüseynov və Fizika Problemləri Elmi-Tədqiqat İnstitutunun “Yüksək enerjilər fizikası” qrupunun kiçik elmi işçisi Nərmin Hüseynova ezamiyyət müddətində nəzəri və praktik kurslar keçib, müxtəlif ölkələri təmsil edən alimlərlə birgə elmi müzakirələrə qatılıblar.

 

Qeyd edək ki, hər il Rusiya Federasiyasının Dubna şəhərindəki Birləşmiş Nüvə Tədqiqatları İnstitutu və MDB ölkələrinin Beynəlxalq İnnovativ Nanotexnologiya Mərkəzi (BİNM) gənc tədqiqatçılar üçün müsabiqə elan edir. Müsabiqədən uğurla keçən namizədlər ezamiyyət müddətində Dubnada Birləşmiş Nüvə Tədqiqatları İnstitutunun (BNTİ), MDB ölkələrinin Beynəlxalq İnnovativ Nanotexnologiya Mərkəzinin rəhbərliyi ilə birhəftəlik xüsusi proqramda iştirak edirlər.