Ölkəmizə gətirilərək reabilitasiya tədbirlərinə cəlb edilən 30 ukraynalı uşağın İsmayıllı rayonuna da ekskursiyası təşkil edilib.

 AzEdu.az xəbər verir ki, ekskursiya Əmək və Əhalinin Sosial Müdafiəsi Nazirliyinin tabeliyindəki Dövlət-Tibbi Sosial Ekspertiza və Reabilitasiya Agentliyinin təşkilatçılığı ilə reallaşıb.

Nazirliyin İctimaiyyətlə əlaqələr şöbəsindən verilən məlumata görə uşaqlar İsmayıllı rayonunun Basqal qəsəbəsində tarixi irsimizlə tanış olub, öz koloritini qoruyub saxlayan qəsəbəni gəziblər. Ukraynalı uşaqların reabilitasiya müddəti ərzində Şamaxıya da səfəri təşkil ediləcək.

Bundan əvvəl isə onlar Qəbələ Arxeoloji Mərkəzində olublar. Mərkəzdə uşaqlara Azərbaycanın tarixi barədə əyani eksponatlar vasitəsilə məlumat verilib.

Agentliyin Qəbələ Uşaq Reabilitasiya Mərkəzində yerləşdirilən uşaqların emosional vəziyyətlərinin stabilləşməsinə, eləcə də cəmiyyətə inteqrasiyalarının təmin edilməsinə dəstək göstərilir.

Onlar müalicəvi masaj, müalicəvi hovuz və vanna, art-terapiya, əmək terapiyası, peşəkar psixoloqlar tərəfindən keçirilən fərdi və qrup terapiyalarında iştirak edirlər.