UNEC-in Zaqatala filialından 168 tələbə məzun olub.

Bu barədə universitetdən AzEdu.az-a məlumat verilib.

Bildirilib ki, tədbirin açılışında Dövlət Himni səsləndirilib və şəhidlərin xatirəsi bir dəqiqəlik sükutla yad edilib.

Zaqatala filialının direktoru professor Orucəli Rzayev tədbirdə çıxış edərək, filialda həyata keçirilən yeniliklər və gələcək planları barədə tədbir iştirakçılarına məlumat verib. Bu il filialdan 168 tələbənin məzun olduğunu deyən O.Rzayev məzunları və onların valideynlərini bu əlamətdar gün münasibətilə təbrik edib. Məzunlara gələcək fəaliyyətlərində uğurlar arzulayıb, vətəninə, xalqına layiqli övlad olmağı tövsiyə edib.

Tədbirdə filialin direktor müavini dosent Həqiqət Qədimova, Zaqatala İqtisad Məktəbinin rəhbəri Babək Alıyev, İqtisadiyyat və idarəetmə kafedrasının müdiri dosent Səfər Razıyev və digərləri çıxış edərək, məzunları təbrik ediblər.

Sonra Zaqatala filialını yüksək nəticə ilə bitirən və universitetin sosial-ictimai həyatında fəal iştirak edən tələbələr Fəxri Fərmanlarla təltif olunublar.

Məzunlar çıxış edərək, tədris ili boyunca onlara dərs deyən, diqqət və qayğı ilə yanaşan müəllimlərinə, kollektivin hər bir üzvünə təşəkkürlərini bildiriblər.

Məzun Günü bədii hissə ilə davam edib.