Bərdə, Ağcabədi və Tərtər Qadın Resurs Mərkəzlərinin üzvləri artıq peşə təhsilinə yiyələnirlər. Bu, Bərdə Peşə Liseyi ilə əməkdaşlıq nəticəsində mümkün olub.

Birləşmiş Millətlər Təşkilatının İnkişaf Proqramı (BMTİP) və Bərdə Peşə Liseyinin Bərdə, Ağcabədi və Tərtər Qadın Resurs Mərkəzlərinin üzvləri üçün təşkil etdiyi “"Microsoft Office" proqramlarının istifadəsi” kursunu uğurla başa vuran 60 qadına peşə sertifikatları təqdim olunub. Kurs Word, Excel və Power Point proqramlarını əhatə edib.

Bu həftə daha bir kurs proqramı başladılıb. Mühasibatlıq üzrə keçirilən proqramdan 60 nəfər qadının faydalanması nəzərdə tutulur.

Qeyd olunan peşə kursları “İqtisadi və sosial iştirakın artmasına mane olan əngəlləri aradan qaldırmaq üçün Azərbaycanda münaqişədən təsirlənmiş həssas qruplara daxil olan qadınların səlahiyyətlərinin artırılması və onlar üçün bərabər imkanların yaradılması" layihəsi çərçivəsində təşkil olunur. BMTİP-in Ailə, Qadın və Uşaq Problemləri üzrə Dövlət Komitəsi ilə birgə həyata keçirdiyi layihəni Britaniya Səfirliyi maliyyələşdirir.