19 dekabrda Təhsil Nazirliyi tərəfindən keyfiyyət dəyişikliklərinin dəyərləndirilməsi məqsədi ilə milli qiymətləndirmə təşkil olunacaq.

Qiymətləndirmə 19 dekabr saat 14:00-dan başlayaraq “Virtual məktəb” platformasında təşkil olunacaq və IV, VI  və IX siniflər iştirak edəcək.

AzEdu.az milli qiymətləndirmədə iştirak edəcək şagirdlər üçün əsas təlimatları təqdim edir:

Qiymətləndirmədə iştirak etmək üçün şagirdlər virtual.edu.az saytına keçid edərək, “Virtual məktəb” ə daxil ol əmrini seçəcəklər. Sonra isə istifadəçi adı və şifrəsini yazmaqla öz “Virtual məktəb” hesabına daxil olacaqlar. Açılan pəncərədə şagirdin aid olduğu siniflər seçilir.

Burada 2019 başlığı ilə şagirdin keçən il təhsil aldığı sinif, 2020 başlığı ilə şagirdin cari tədris ilində oxuduğu sinif görünür. Bu siniflərdə şagirdlər sinif yoldaşları, tədris olunan fənn müəllimləri və sinif rəhbərləri ilə birlikdə qruplaşdırılıb.

Digər pəncərədə isə şagirdlər Azərbaycan və rus bölmələri üzrə qruplaşdırılan ümumi qruplardır. Milli qiymətləndirmə məhz bu pəncərə vasitəsi ilə keçiriləcək. Bunun üçün şagird ilk olaraq ümumi qrupa daxil olaraq  kanal hissəsini seçir və yuxarı paneldən testlər alt bölməsini açır. Bu hissədə şagirdlər test linki ilə tanış olacaq və elan mətnini görəcəklər.

Müəyyən olunan vaxt çərçivəsində onlar testləri yerinə yetirməlidilər. IV siniflər 1 saat 20 dəqiqə, VI siniflər 2 saat, IX siniflər isə 3 saat müddətində testləri yerinə yetirmə imkanı verilir. Vaxt bitdikdən sonra həmin testlərə giriş etmək qeyri-mümkün olacaq.