“İstər məktəblərdə, istərsə də universitetlərdə məzun günü ilə bağlı nizamlama sistemi, qaydalar olmalıdır”.

Bu sözləri AzEdu.az-a açıqlamasında Azərbaycan, Rusiya və Türkiyənin iqtisad elmləri doktoru, professor Zahid Məmmədov qeyd edib.

Professor ali məktəbdən məzun olan şəxsin həmin günü Nobel mükafatçısı, alimlərlə ilə görüşünü məqsədəuyğun hesab edir:

“Nəzərə alsaq ki, məzunlara artıq uzun müddət fəaliyyətlərinin qiymətləndirməsinin nəticəsinə uyğun olaraq diplom verilir. Bu böyük bir uğurun nəticəsidir. Ümumiyyətlə hesab edirəm ki, məktəblərdə və universitetlərdə məzunlar günü ilə bağlı nizamlama sistemi, müəyyən qaydalar olmalıdır. Bu qaydalar məzunlar günü üçün təşkil olunan konsertdə həm polisə, həm də hüquq-mühafizə orqanlarının işini daha yaxşı icra etməsinə də şərait yaratmış olar. Nizamlama sistemində məzunların geyiminə qədər bütün məsələlər əks olunmalıdır. Təəssüflər olsun ki, “diskoteka” kimi hallara rast gəlinir. Axı məzunlar örnək olmalıdırlar.

Yaxşı olar ki, ali məktəbdən məzun olan şəxsə həmin günü Nobel mükafatçısı ilə görüşü təşkil olunsun. Həmçinin Azərbaycanda böyük uğur qazanmış iş adamları məzunlar üçün çıxışlar etsinlər. Bu çox gözəl yadda qalar”.

Z.Məmmədov qeyd edib ki, məzun günlərinin gecə saatlarında keçirilməsi doğru deyil:

“Məzunlar niyə məhz müğənnilərlə görüşməlidir? Müğənniləri məclislərə dəvət etməyi hər kəs edir, bu artıq standartdır. Onsuz da hər yerdə müğənni var. Yəni məzun günü də müğənniyə gərək varmı? Bir tələbə son gününü müğənni ilə keçirməsi nə dərəcədə düzgündür? Söhbət əgər ciddiyyətdən gedirsə, niyə həmin gün simfonik orkestr olmur? Məzun gecəsi üçün ümumi qayda tərtib olunmalıdır ki, məzunlar nə geyinsinlər. Bununla bağlı konkret qayda mövcud olunmalıdır.

Biz güclü dövlətdə yaşayırıq və hər şey qanun çərçivəsində həyata keçirilir. Ümumiyyətlə gecə saatlarında məzun gününün qeyd edilməsinə icazə vermək olmaz və ya məzunlar üçün tərtib olunan sistemdə məzun gecəsi üçün müəyyən saatlar təyin olunsa, daha məqsədəuyğun olar. Həmin gün məzun ixtisası üzrə ən yaxşı müəllimlə, həkimlə, hüquqşünasla, iqtisadçıyla görüşsə, onlardan tövsiyə alsa çox gözəl olar. Təəssüflər olsun ki, bu gün tələbələr ən sevincli gününü müğənni ilə paylaşır”.