Paytaxt məktəblərində metodbirləşmə rəhbərləri tərəfindən sertifikatlaşdırma prosesi ilə bağlı görüşlər davam edir. Görüşlərdə məktəb direktorları, riyaziyyat, ingilis, rus, alman, fransız dili, eyni zamanda, tədrisi digər dildə olan bölmədə dərs deyən Azərbaycan dili müəllimləri iştirak edirlər.

Bakı Şəhəri üzrə Təhsil İdarəsindən AzEdu.az-a bildirilib ki, müəllimlərə dəstək məqsədilə keçirilən görüşlərdə onların sertifikatlaşdırılması prosesinin təhsilin keyfiyyət göstəricilərinə, həmçinin sertifikasiya nəticəsinin müəllimlərin karyera inkişafına və əməyinin stimullaşdırılmasına müsbət təsirləri barədə danışılır.

Həmçinin sertifikatlaşdırma prosesinin qaydaları barədə məlumat verilir, təhsil işçilərinin üzərinə düşən vəzifələrdən söz açılır.

Daha sonra görüşdə fikir mübadiləsi aparılır, müəllimləri maraqlandıran suallar cavablandırılır.

Qeyd edək ki, müəllimlərin sertifikatlaşdırılmasında əsas məqsəd ümumi təhsil müəssisələrində pedaqoji və idarəetmə fəaliyyəti ilə məşğul olan, ali və orta ixtisas təhsilinə malik təhsilverənlərin peşəkarlıq səviyyələrini və peşə yararlılıqlarını yoxlamaq, onların peşəkar inkişafına nail olmaq və təlim ehtiyaclarını öyrənməkdən ibarətdir.