Dövlət İmtahan Mərkəzinin (DİM) yaydığı məlumata əsasən ali təhsil müəssisələrinə ixtisas seçimi avqustun 28-nə qədər davam edəcək.

Hazırda abituriyentlər bu prosesin həyəcanını yaşayırlar. Bu zaman onlara istiqamət və dəstək verən ən birinci şəxs valideynləridir. Lakin bəzi valideynlər övladlarının istəklərini nəzərə almır, yalnız öz istədikləri ixtisas və universitetet üzrə seçim etmələrini onlardan tələb edirlər.

Bəs bu kimi hallar niyə görə baş verir? İxtisas seçimi zamanı abituryentlərin fikirlərinin nəzərə alınmaması hansı fəsadlara yol açır?

Mövzu ilə bağlı AzEdu.az-a danışan təhsil üzrə mütəxəssis Nadir İsrafilov vurğulayıb ki, belə qərarların verilməsin övladına basqı edən valideynlər sonda peşman olur:

“Gənclərə daha çox valideynlər basqı edirlər. Bu da təbiidir, çünki hər bir valideyn öz övladının gələcəyini onun ali təhsil almasında, diplom sahibi olmasında görür. Hətta diplomun cehiz predmetinə çevrilməsi barədə az deyilməyib, az yazılmayıb. Övladlarına “filankəsin övladı xaricdə təhsil alır, sən heç burda da universitetə daxil ola bilmədin” kimi valideyn tənələrinin az şahidi olmamışıq.

Hamısı mentalitetdən, kimlərləsə bəhs aparmaq prinsipindən irəli gələn xüsusiyyətlərdir. "Təki diplom olsun, qonum-qonşunun yanında başımız uca olsun", deyən bir çox valideyn öz övladlarını onların arzusuna uyğun düzgün istiqamətə yönləndirib, onların müstəqil seçiminə mane olmamaq əvəzinə, övladlarının seçiminə müdaxilə edir, yalnız bu müdaxilənin ağır nəticələrini gördükdən sonra peşmanlıq çəkirlər ki, onda da artıq gec olur.”

N.İsrafilov ixtisas seçimi zamanı abituriyentlərin fikirlərinin nəzərə alınmamasını nə ilə nəticələnəcəyindən söz açıb:

“Elm və təhsil naziri Emin Əmrullayevin təbirincə desək, nəticədə hüquqşünas ixtisasında qəbul ola bilməyənlər tarixçi olurlar. İxtisas seçimini əmək bazarına görə yox, valideynin seçiminə görə edənlər əlavə seçim qarşısında qalırlar. İxtisasdəyişmə, yerdəyişmə halları ildən-ilə artır. Hər il qəbul imtahanlarında iştirak edib, müsabiqə şərtini ödəyən yüzlərlə, bəzən minlərlə məzunun elektron qaydada müraciətlərini təsdiq etməmələri kimi hallar baş verir”.