Ulu Öndər Heydər Əliyevin 100 illik yubileyinə həsr olunmuş “Ürəklərə iz salan insan” adlı tədbir keçirilib.

Bu barədə BŞTİ-dən AzEdu.az-a məlumat verilib.

Bildirilib ki, Bakı şəhəri 20 nömrəli məktəb-lisey tərəfindən təşkil olunan tədbirdə Bakı Şəhəri üzrə Təhsil İdarəsinin (BŞTİ) müdiri Mehriban Vəliyeva, millət vəkili İlham Məmmədov, Yasamal Rayon İcra Hakimiyyəti (RİH) başçısının müavini Təravət Muradova, Azərbaycan Təhsi̇l İşçi̇ləri̇ Azad Həmkarlar İtti̇faqı Yasamal rayon komitəsinin sədri Rövşən İbrahimli, şəhidlərin ailə üzvləri və qazilər, “Fire Land Production”ın rəhbəri Cəlal Qurbanov, Yasamal Rayon Polis İdarəsinin Yetkinlik yaşına çatmayanlarla profilaktiki işin təşkili bölməsinin rəisi, polis polkovnik-leytenantı Nəbi Nəcəfov, Milli Olimpiya Komitəsinin nümayəndəsi Ruslan Məmmədov, BŞTİ-nin müvafiq struktur bölmə rəhbərləri, Yasamal RİH-in əməkdaşları, məktəb direktorları, müəllimlər və şagirdlər iştirak ediblər.

Öncə məktəbin həyətində hərbi orkestrın ifasında Dövlət Himni səsləndirilib və şagirdlərin iştirakı ilə fləşmob nümayiş olunub.

Daha sonra şagirdlər Heydər Əliyev adına muzeydə dövlət xadimlərinin Ulu Öndər haqqında söylədikləri fikirləri səsləndiriblər.

Sonra qonaqlar Ulu Öndər Heydər Əliyevin büstü önünə gül dəstələri qoyublar.

Tədbir Ulu Öndərin və Vətən şəhidlərinin xatirəsinin bir dəqiqəlik sükutla yad edilməsi ilə başlayıb.

Tədbirdə şagirdlər dahi şəxsiyyət Heydər Əliyevə həsr olunmuş ədəbi-bədii kompozisiyalar nümayiş etdiriblər. Həmçinin məktəblilərin vətənpərvərlik mövzusunda səsləndirdikləri mahnılar maraqla qarşılanıb.

Tədbirdə Azərbaycan xalqının dahi oğlu, qüdrətli dövlət xadimi və müdrik siyasətçi, müstəqil Azərbaycanın memarı Heydər Əliyevin həyat və fəaliyyətindən bəhs edən videoçarxlar nümayiş olunub.

Tədbirdə çıxış edən BŞTİ-nin müdiri M.Vəliyeva bu il 100 illik yubileyi qeyd olunan Ulu Öndər Heydər Əliyevin Azərbaycan xalqının tarix boyu yetişdirdiyi nadir və bənzərsiz şəxsiyyəti kimi milyonlarla insanın qəlbində əbədi yaşadığını söyləyib. Ulu Öndər Heydər Əliyevin təhsilə daim böyük önəm verdiyini deyən İdarə müdiri ümummilli liderin ideyalarının Azərbaycan Prezidenti İlham Əliyev tərəfindən qətiyyətlə həyata keçirildiyini diqqətə çatdırıb.

İdarə müdiri Ümummilli Lider Heydər Əliyevin uğurlu həyat və fəaliyyətini təhsil müəssisələrində geniş təbliğ etmək məqsədilə Elm və Təhsil Nazirliyi və Bakı Şəhəri üzrə Təhsil İdarəsi tərəfindən keçirilən çoxsaylı tədbirlərdən, layihələrdən bəhs edib. Bildirib ki, 20 nömrəli məktəb-lisey tərəfindən təşkil olunmuş “Ürəklərə iz salan insan” adlı tədbir paytaxt məktəblilərinin Heydər Əliyev dühasına sevgi və ehtiramının bariz nümunəsidir.