Azərbaycan Respublikasının Birinci vitse-prezidenti Mehriban Əliyeva atası, akademik Arif Paşayevin doğum günü ilə əlaqədar sosial şəbəkə səhifəsində paylaşım edib.

AzEdu.az həmin paylaşımı təqdim edir:

“Böyük ürək sahibi, nurlu, mehriban İnsan! Ad günün mübarək! Sənə möhkəm cansağlığı, gümrahlıq və gözəl əhval-ruhiyyə arzulayıram! Sən gözəl ata və qayğıkeş babasan! Sənə sevgimiz sonsuzdur! Ömrün uzun olsun! Uca Allah bütün valideynləri qorusun!”.

Qeyd edək ki, bu gün Milli Aviasiya Akademiyasının rektoru, akademik Arif Paşayevin doğum günüdür. Onun 89 yaşı tamam olub.

Arif Mircəlal oğlu Paşayev 1934-cü il fevralın 15-də Bakıda anadan olub. 1957-ci ildə Odessa Elektrotexnika Rabitə İnstitutunu radiofizika ixtisası üzrə təhsil alan A.Paşayev 1959-cu ildən AMEA-nın Fizika İnstitutunda elmi fəaliyyətə başlayıb. Həmin vaxtdan o, yarımkeçirici materialların elektrofiziki parametrlərini kontaktsız ölçmək üçün cihazlar, maşınqayırma məmulatına nəzarət üçün cərəyan burulğanlarından istifadə edən qurğular, mikrominiatür dəqiq çeviricilər yaradıb seriya ilə istehsala buraxıb.

Alimin əldə etdiyi elmi nəticələrin bir çoxu ixtira səviyyəsində işlənib beynəlxalq sərgi və müsabiqələrdə qızıl, gümüş medallar və diplomlarla təltif olunmuş, bir sıra sənaye müəssisələrində tətbiq edilib.

Görkəmli alim 1960-1964-cü illərdə Moskvada "QİREDMET" İnstitutunda aspirant oub, 1966-cı ildə isə "Yüksək və ifratyüksək tezliklərdə yarımkeçiricilərin parametrlərini ölçmək üçün kontaktsız üsul və cihazların işlənməsi" mövzusunda namizədlik dissertasiyasını müdafiə edərək, texnika elmləri namizədi alimlik dərəcəsi alıbdır. A.Paşayev fizika-riyaziyyat elmləri doktorudur.

Arif Paşayev görkəmli yazıçı Mir Cəlal Paşayevin oğludur. Onun ailəsində doğulub boya-başa çatan Mehriban Əliyeva Azərbaycanın birinci xanımı, Birinci vitse-prezidentidir. Ailənin digər övladı Nərgiz Paşayeva isə həyatını elmə həsr edib: M.V.Lomonosov adına Moskva Dövlət Universitetinin Bakı filialının rektoru, Azərbaycan Milli Elmlər Akademiyasının vitse-prezidentidir.