XƏBƏRLƏR

08.10.2019 14:22
“Məktəb direktorları vəzifəli şəxslərə söykənərək özbaşınalıq edirlər”

Ötən gün təhsil naziri Ceyhun Bayramov Kəlbəcər rayonu 108 nömrəli tam orta məktəbin direktoru Bəsti Hüseynovanı tutduğu vəzifədən uzaqlaşdırıb.
Aparılan araşdırmaya görə, direktor icarə adı ilə müəllimlərdən pul yığıb.

Bu məsələ sosial şəbəkələrdə geniş müzakirəyə səbəb olub və belə halların digər məktəblərdə də olduğu bildirilib.

Maraqlıdır, məktəblərdəki bu cür özbaşınalığın qarşısını necə almaq olar? Günahkar tərəf yalnız direktorladır, ya ikinci tərəf də var?

AzEdu.az xəbər verir ki, Məsələ ilə bağlı Modern.az-a danışan deputat Sona Əliyeva deyir ki, insanlar susmasınlar ki, belə problemlər qabarıb öz həllini tapsın.

“Tək təhsildə yox, hər sahədə bu cür özbaşınalığa, haqsızlığa son qoyulmalıdır. Sağ olsun ki, Ceyhun Bayramov məsələdən xəbər tutan kimi direktoru işdən çıxarıb. Elə direktor olacaq ki, bu hadisədən təsirlənəcək lakin elələri də var ki, ümumiyyətlə buna məhəl qoymayacaq. Çox yaxşı haldır ki, Təhsil Nazirliyi insanlara, mətbuata bu qədər açıqdır və öz sahəsindəki narazılıqları aktiv şəkildə aradan qaldırır”.

Təhsil eksperti Etibar Əliyevin sözlərinə görə, bu cür özbaşınalıq təkcə 108 nömrəli məktəbdə baş vermir.

“Məktəbdə baş verən neqativ hallar növündən asılı olmayaraq təhsilə, tərbiyəyə təsir göstərən faktordur. Əksər məktəblərdə qeyri-qanuni şəkildə vətəndaşlardan pul tələb etmək prosesi gedir, lakin məsələ qapalı qalır. Belə özbaşınalığın qapalı qalmasının iki səbəbi var. Birincisi, valideyn etinasızlığı, yəni tələb olunan məbləğin ödənilməsidir. Digər səbəb isə məktəb direktorlarını himayə edən şəxslərin olmasıdır. Bu gün Bakı, eləcə də rayonlardakı məktəbləri himayə edən vəzifəli şəxslər var. Məktəb direktorları da həmin vəzifəli şəxslərə söykənərək istənilən özbaşınalığı edirlər. Buna görə də Təhsil Nazirliyinin İctimai Şurasının üzvü kimi hesab edirəm ki, bu gün valideynlər məktəbdə neqativ hal baş verən kimi bizə də məlumat versinlər. Çünki biz həmin məsələləri təhsil naziri Ceyhun Bayramovun qarşısında qaldıra bilərik. Artıq 21-ci əsrdə yaşayırıq, dünyada məktəblər başqa yöndə fəaliyyət göstərirlər. Bu cür neqativ hal bizdəki bəzi direktorların feodal təfəkkürünün təzahürüdür. Birmənalı olaraq uşağın məktəbə pul gətirməsi ona mənfi təsir edir, məktəblə valideyn, cəmiyyət arasında qarşıdurma yaradır. Bu isə orta təhsil üçün yad bir məsələdir və belə halların kökü kəsilməlidir. Direktorun işdən çıxarılmasını təqdir edirəm”.

Milli Məclisin deputatı Aydın Mirzəzadə bildirib ki, Təhsil Nazirliyinin təhsil sahəsində baş verən hadisələrə operativ münasibət göstərməsini müsbət qiymətləndiririr:

"Ümumiyyətlə hökumət idarələrimizin bir çoxu bu məsələləri anidən diqqətə alıb araşdırır və cəmiyyətə məlumat verir. Məktəblərdən birində pul yığılması ilə bağlı xəbər yayıldıqdan sonra rtəhsiul nazirinin müavini Məhəbbət xanım ora gedib yerində hadisəni araşdıdırdı. Bu da məktəb direktorunun dəyişdirilməsi ilə nəticələndi. Bununla bir daha aydın oldu ki, məktəb yalnız təhsil verilən yerdir. Burada qeyr-qanuni hərəkət etmək, valideynlərdən pul yığmaq təhsilimizə, adımıza ləkə gətirir. Ceyhun Bayramovun da belə operativ olması göstərdi ki, məktəb təlim-tərbiyə, təhsil verən müəssisə kimi hər zaman müqəddəs saxlanılacaq”.

İlin gənc müəllimi-Müraciət formu