AMEA-da Folklor İnstitutunun təşkilatçılığı ilə “Folklor və mənəvi bütövlük: Güney Azərbaycanın folklor irsi” mövzusunda respublika elmi konfransı keçirilib.

Bu barədə AzEdu.az-a institutdan bildirilib. Konfransı açan Folklor İnstitutunun baş direktoru akademik Muxtar Kazımoğlu-İmanov Güney Azərbaycan folklor örnəklərinin toplanması, öyrənilib tədqiq edilməsi ilə bağlı son illər ərzində institutda görülmüş işlər nəzərdə tutulan layihələrdən danışıb.

Milli mədəni irsimizin ayrılmaz tərkib hissəsi olan Güney Azərbaycan folklorunun daha ətraflı şəkildə öyrənilməsinin vacibliyini vurğulayan akademik qeyd edib ki, Folklor İnstitutunda bir neçə il əvvəl yaradılan Cənubi Azərbaycan folkloru şöbəsinin fəaliyyəti sayəsində güneyli soydaşlarımızla ədəbi-mədəni əlaqələr genişləndirilib, “Güney Azərbaycan folkloru” seriyasından 20-yə yaxın kitab, eləcə də “Təbriz folklor örnəkləri” toplusu çap olunub, bu materialların araşdırılması istiqamətində çoxsaylı tədqiqatlar aparılıb.

Sonra filologiya elmləri doktoru, professor Rüstəm Kamalın “Güney Azərbaycan folklorunda simvol sistemi”, filologiya üzrə fəlsəfə doktoru, dosent Ağaverdi Xəlilin “Güney Azərbaycan mərasim folklorunda keçəçi personajı və arxaik keçi oyununun rudimentləri”, filologiya elmləri doktoru, professor Almaz Həsənqızının “Bayatılarda bütövləşən vətən” və filologiya elmləri doktoru, professor Esmira Fuadın “Güney Azərbaycan uşaq folkloru uşaq dünyasına açılan pəncərədir” mövzularında məruzələri dinlənilib.

Güneyli ziyalı, yazıçı və publisist Aqşin Ağkəmərli konfransın işini yüksək dəyərləndirib, məruzəçilərə və konfransın təşkil olunmasında əməyi keçən hər kəsə təşəkkürünü bildirib.

Konfrans işini bölmə iclaslarında davam etdirib. İki bölmədə ölkəmizin müxtəlif elm və ali təhsil müəssisələrini təmsil edən elm xadimləri, araşdırmaçılar, onlayn şəklində təşkil olunmuş üçüncü bölmə iclasında isə respublikamızla yanaşı, Türkiyə və İranın tanınmış alim və tədqiqatçıları da məruzələrlə çıxış ediblər. Bütün çıxışlar geniş fikir mübadiləsinə və maraqlı müzakirələrə səbəb olub.