Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə Bakı İnsan Hüquqları Məktəbi İctimai Birliyi tərəfindən məktəblilər arasında təşkil olunan “Zəfər tarixi” Esse Olimpiadasının Final mərhələsinə yüksələn şagirdlərlə tədbir keçirildi.

Bakı şəhəri Sabunçu rayonu Firuz Bayramov adına 22 nömrəli tam orta məktəbdə təşkil olunan tədbiri giriş sözü ilə Bakı İnsan Hüquqları məktəbi İctimai Birliyinin sədri Azər Ələkbərov açaraq qeyd etdi ki, bütün respublika məktəblilərini əhatə edən layihə şagirdlər arasında böyük rezonansa səbəb olmuşdur, ölkənin müxtəlif bölgələrindən ümumilikdə 466 Esse müsabiqəyə təqdim olunub.

Layihə rəhbəri qeyd etdi ki, Layihənin Fəaliyyət Planına əsasən Münsiflər heyəti tərəfindən 10 finalçı müəyyən olunmalı və son mərhələdə 1-ci, 2-ci və 3-cü yer qalibləri seçilməli idi.

Lakin, məktəblilər tərəfindən birliyin elektron ünvanına göndərilən Esselərin səviyyəsi, şagirdlərin inşa səmimiliyi, Zəfər tariximizə sevgisi, Şəhidlərimizə ehtiramı o qədər yüksək səviyyədə özünü biruzə verdi ki, Final turuna 31 Esse seçildi.

Tədbir iştirakçılarının yekdil rəyinə görə təklif olundu ki, bütün finalçılar qalıb elan olunsun və ilk üç yerlər bütün finalçılar arasında bölünsün.

Layihə rəhbərliyi və Münsiflər heyəti bu təklifdən irəli gələn yekun qərarı Final tədbirinədək bildirəcəklərinə söz verdilər.

Tədbirdə bütün natiqlər, o cümlədən, valideynlər və şagirdlər layihənin yüksək səviyyədə həyata keçirilməsinə görə Bakı İnsan hüquqları məktəbinə, bu kimi faydalı layihələrə maliyyə dəstək verdiyinə görə Azərbaycan Respublikasının

Qeyri-Hökumət Təşkilatlarına Dövlət Dəstəyi Agentliyinə minnətdarlıqlarını bidirdilər, layihənin davamlı olmasını və "Zəfər tarixi"  Olimpiadasının hər il təşkil olunmasını arzu etdilər.

Sonda bütün finalçılar Diplomlarla və hədiyyələrlə təltif olundular.