Gəncə şəhəri və Samux rayonunda direktor, direktor müavinləri və ibtidai sinif müəllimləri ilə sertifikatlaşdırma prosesinə dair məlumatverici görüş keçirilib. Görüşdə 300-dən çox ibtidai sinif müəllimi iştirak edib.

Bu barədə AzEdu.az-a Təhsil Nazirliyindən məlumat verilib. Bildirilib ki, Samux rayon təhsil sektorunun müdiri Nurlana Həsənova sertifikatlaşdırma prosesi barədə danışıb və təhsilverənlərə uğurlar arzulayıb.

Görüşdə Təhsil Nazirliyinin İnsan resursları şöbəsinin əməkdaşı Tükəzban Quliyeva təhsilverənlərin sertifikatlaşdırılması prosesi ilə bağlı təqdimatla çıxış edib. O, Təhsil Nazirliyi və Təhsil İnstitutunun bu istiqamətdə gördüyü dəstək tədbirlərini qeyd edib, sertifikatlaşdırmanın təkcə qiymətləndirmə deyil, həmçinin təhsilverənlər üçün peşəkar inkişaf aləti olduğunu vurğulayıb.

Təhsil İnstitutunun ibtidai təhsil üzrə təlimçisi Vəfa Məmmədova sertifikatlaşdırmanın məzmunu ilə bağlı məsələlər barədə fikirlərini bölüşüb, metodika üzrə nümunə test tapşırıqlarını izah edib.

Tədbirdə görüş iştirakçılarını maraqlandıran suallar cavablandırılıb.