Dövlət İmtahan Mərkəzinin ödənişli xidmətlərindən faydalanmaq istəyən istifadəçilər "Şəxsi kabinet"lərinin hesabına tələb olunan məbləği əlavə etməlidirlər.

Bəzi namizədlər isə, ödənişlərdə müəyyən çətinliklər yaşayırlar.

AzEdu.az DİM-ə istinadən  vətəndaşların “Şəxsi kabinet” yaratdıqdan sonra ödəmə həyata keçirmək üçün istifadə edə biləcəyi  bir neçə üsulu təqdim edir:

Vətəndaş bank kartı vasitəsilə onlayn şəkildə “AsanPay” (təhsil ödənişləri->DİM) və “Hesab.az” (təhsil->DİM), “Hökumət ödəniş portalı” (bütün ödənişlər->təhsil->DİM), expresspay.az (qeydiyyatsız ödəniş->təhsil->bütün operatorlar->DİM) və ya bu elektron ödəniş sistemlərinin şəbəkələrinə qoşulmuş ödəniş terminalları vasitəsi ilə apara bilərlər.

Bank kartı olmayanlar “Şəxsi kabinet” yaratdıqdan sonra ödənişi həyata keçirmək üçün “Hökumət ödəniş infrastrukturu”na qoşulan bütün banklar, bankların filialları, şöbələri, həmçinin “Azərpoçt”un filial və şöbələrində şəxsiyyət vəsiqəsi və ya “Şəxsi kabinet”inin nömrəsini əməliyyatçıya təqdim etməklə ödəməni həyata keçirə bilərlər. (əməliyyatçıya “Hökumət ödəniş portalı” vasitəsilə Dövlət İmtahan Mərkəzinin xidmətlərindən istifadə etmək üçün “Şəxsi kabinet”ə vəsait qoymaq istədiyini bildirmək kifayətdir).

Banklara məxsus ödəniş terminalları (məsələn “ExspressPay” (təhsil->DİM) və poçt şöbələrində olan e-GovPay ödəniş terminalları vasitəsilə də nağd şəkildə “Şəxsi kabinet”inizin hesabına vəsait əlavə edə bilərsiniz. Expresspay ödəniş terminallarının ünvanları, Asanpay ödəniş terminallarının ünvanları, e-GovPay ödəniş terminallarının ünvanları.

Bundan əlavə, bank kartı olmayanlar portmanat.az mikro ödənişlər sistemi ilə də Portmanat kod əldə etməklə lazımi vəsaiti hesablarına yükləyə bilərlər. Portmanat kod MilliÖN, eManat, Expresspay ödəmə terminalları vasitəsi ilə əldə edilə bilər. Kodun əldə edilməsi üçün ardıcıllıq aşağıdakı kimidir:

Ödəmə kartları -> Portmanat Code -> Mobil nömrə daxil edilir -> Məbləğ daxil edilir. Əməliyyatın sonunda daxil edilən mobil nömrəyə 9889 qısa nömrəsindən Portmanat kodu SMS vasitəsi ile göndərilir, eyni zamanda qəbzin üzərində də çap olunur. Portmanat kodla DİM-ə ödəniş etmək üçün portmanat.az saytına və ya mobil tətbiqinə daxil olduqdan sonra "Qeydiyyatsız ödənişlər" bölməsindən "Dövlət ödənişləri" bölməsinə daxil olmalısınız. Daha sonra "DİM" seçilir. 2 seçim imkanı var: DİM (Kabinet nömrəsi ilə) və DİM (Şəxsiyyət vəsiqəsi ilə). Seçimlərdən hər hansı birini seçərək ödəniş qəbzindəki pin kodu daxil etməklə ödəniş edilir.

Qeyd edək ki, onlayn və ya digər əməliyyatlar zamanı təqdim olunan ödəniş qəbzlərini itirməyin və müvafiq vəsaitin hesabınıza köçürülməsinə əmin olana qədər özünüzdə saxlamağınız gərəkdir.