AzEdu.az hamının tanıdığı sənət adamları, ictimai şəxslər, idmançılar, media nümayəndələrinin məktəb illərindən bəhs edən silsilə yazılarını davam etdirir.
“Etdiyim hərəkətə görə peşman oldum”
“Parta etirafları” rubrikasının növbəti qonağı xanəndə, opera müğənnisi, Xalq artisti Aygün Bayramovadır.
Məktəb dövründə müəllimlərin sevimlisi olduğunu qeyd edən Aygün xanım, o illəri çox gözəl xatirələrlə yada saldığını deyir:
“Məktəb illərim gözəl Qarabağımızda, Ağdamda keçib. Uşaqlığımız o gözəl məkanımızda keçsə də, təəssüf ki, həmin yerlərə indi gedə bilmirik.
Orta məktəbi doğma Qarabağda bitirmişəm. Məktəb illərim çox gözəl keçib və o dövrü xoş xatirələrlə xatırlayıram. Ailədə evin ən kiçik övladı, eyni zamanda, ərköyün qızı olmuşam. Musiqini, muğamı 9 yaşımdan ifa etməyə başlasam da, dərslərimə də həmişə diqqət etmişəm. Məktəb illərində həm yaxşı şagird, həm də müəllimlərin sevimlisi olmuşam. Ədəbiyyatı, Azərbaycan dilini eləcə də, başqa fənləri çox yaxşı oxumuşam.
Çılğın, emosional şagird idim... Dərslərimi yaxşı oxusam da, hamı bilirdi ki, incəsənət sahəsini seçəcəyəm. Müəllim sərbəst inşa yazısını yazmağı tapşıranda həmişə “mən konservatoriyaya qəbul olacağam” yazırdım”.
Aygün Bayramova oxuduğu təhsil müəssisəsi, məktəb illərində indi də gülümsəyərək xatırladığı xatirələrini də bizimlə bölüşüb:
“Mən A. Zeynallı adına Bakı Musiqi Kollecini 1989-cu ildə bitirmişəm; Şövkət Ələkbərovanın sinfində təhsil almışam.
Daha sonra isə Ü.Hacıbəyli adına Azərbaycan Dövlət Konservatoriyasında təhsilimi tamamlamışam. Konservatoriyada təhsil aldığım müddətdə ustadım Arif Babayev oldu.
Mən qastrol səfərlərinə, konsertlərə, tədbirlərə getməyimə baxmayaraq, dediyim kimi, dərslərimə həmişə məsuliyyətlə yanaşmışam. Riyaziyyat müəllimimiz var idi, bir dəfə bizə ev tapşırığı vermişdi. Mən müəllimin verdiyi ev tapşırığını yerinə yetirsəm də, bəzi yerdə səhvlər etmişdim. Buna görə də, müəllim mənə bir az qəzəbləndi, durub buna görə sinfi tərk etdim... (gülür)
Onu da qeyd edim ki, sonradan bir neçə dəfə həmin Riyaziyyat müəllimin dərsində iştirak etmədim. Sonra fikirləşdim ki, o, müəllim eyni zamanda böyükdür və etdiyim hərəkətə görə peşman oldum. Müəllim də sonra dedi ki, yaxşı oxuyan şagird olduğun üçün, səndən hər zaman düzgün yazmağı tələb edirəm. Oxumayan şagirddən isə heç vaxt bu cür tələb etmərəm.
Məktəb illərində baş verən maraqlı hadisələrim çox olub. Amma onları xatırlaya bilmirəm. O illərdə 11 il parta arxasında oxuduğum sinif yoldaşlarımın bəzilərini indi görsəm də tanımaram. Çünki orta məktəbi bitirməyimdən illər keçib.
Rayonda hər kəs məni balaca ifaçı kimi tanıyırdı. Elə kiçik yaşlarımdan... Oxuduğum məktəbin direktoru mənə deyirdi ki, yaxşı xanəndə, müğənni olacaqsan, çünki çox istedadlı qızsan”.
Qeyd edək ki, Aygün Bayramova teatr səhnəsində bir çox muğam operalarında aparıcı partiyaları – "Leyli və Məcnun"da Leyli, "Natəvan"da Müğənni, "Koroğlu"da Xanəndə qız, "Aşıq Qərib"də Şahsənəmi böyük ustalıqla ifa edib.
Günel YAŞARQIZI
kitabı