“Universitetlər öz reytinqlərinə diqqət ayırmalıdır. Düşünməlidirlər ki, yüksək nəticə göstərən abituriyentləri özlərinə necə cəlb edə bilərlər?”

Bu sözləri AzEdu.az-a açıqlamasında təhsil eksperti Elçin Əfəndiyev (Əfəndi)  bildirib.

Onun sözlərinə görə keçid ballarının aşağı olması universitetlərin reytinq göstəricisidir:

“Çünki həmin ali təhsil müəssisəsinə müraciət edən abituriyentlər əsasən zəif bal toplayanlar olurlar. Nəticədə sözügedən ali məktəbin ixtisaslarında keçid balları digər universitetlərə nəzərən daha aşağı qərarlaşır. Məsələn, imtahan verən abituriyentlərin böyük əksəriyyəti əgər 300 bal toplayıblarsa, demək həmin universitetin də keçidi 250-300 və yaxud da 310-315 baldır. Yox əgər abituriyentlərin böyük qismi 400-450 bal toplayıbsa, demək həmin universitetlərin ixtisaslarında 400-450 balın üzərində keçid balı formalaşıb. Ümumilikdə abituriyentlərin hər biri yüksək nəticə göstərsələr, təbii ki, həmin universitetin keçid balları da qalxmış olacaq".

Ekspertin sözlərinə görə abituriyentlərin yüksək nəticə göstərə bilməməsinin bir neçə səbəbi var:

“2019-cu ildən kurikulum üzərində qəbul imtahanları həyata keçirildiyi üçün bu abituriyentlərin nəticələrinə müəyyən qədər təsir edib. İmtahan verən namizədlər hələ də tam olaraq prosesə adaptasiya ola bilməyiblər. Bu səbəbdən onların nəticələri ənənəvi qaydada imtahanların keçirildiyi dövrə nəzərən ürəkaçan deyil. Bir neçə il bundan öncə yüksək bal toplayanların sayı çox olurdu. Lakin son illər biz bunu müşahidə etmirik. Təbii ki, qeyd etdiyim məsələyə pandemiyanın da təsiri oldu. Amma əsas səbəb kimi kurikulum üzrə keçirilən imtahanları görürəm”.

Elçin Əfəndi qeyd edib ki, builki imtahanlarda universitetlərdə keçid balına təsir edən faktları görəcəyik:

“Bu ilin abituriyentləri əvvəlki dövrlərə nəzərən bir qədər hazırlıqlıdırlar. Bir neçə universitetin prestijli ixtisaslarında keçid ballarının artması gözlənilir. Amma onu da nəzərə almalıyıq ki, ümumi plan yerləri artanda, bu, keçid ballarının aşağı düşməsinə səbəb olur.

Müşahidə etdikdə rahat şəkildə görmək olur ki, bir neçə universitetdə keçid balları hər zaman aşağı olaraq qərarlaşır. Məhz həmin universitetlər öz reytinqlərinə diqqət ayırmalıdır. Düşünməlidirlər ki, yüksək nəticə göstərən abituriyentləri özlərinə necə cəlb edə bilərlər?”.