18 oktyabr 2018-ci il tarixində Dövlət İmtahan Mərkəzinin əməkdaşları tərəfindən “Dövlət qulluğu vəzifələrinin tutulması məqsədilə müsahibənin keçirilmə qaydaları” mövzusunda təlim təşkil olunub. Təlimdə Nəqliyyat, Rabitə və Yüksək Texnologiyalar Nazirliyinin rəhbər vəzifəli şəxsləri və müsahibələrdə müstəqil ekspert qismində iştirakı nəzərdə tutulan şəxslər iştirak ediblər.
Təlimdə iştirakçılara müsahibənin strukturu, keçirilmə qaydaları, namizədin qiymətləndirilmə meyarları haqqında ətraflı məlumat verilib, müsahibə prosesi zamanı baş verməsi mümkün olan bəzi fövqəladə hallar zamanı hansı addımların atılmasının məqsədyönlü olacağı məsələləri müzakirə olunub. Həmçinin, təlim iştirakçılarına dövlət orqanlarında vakant vəzifələrin elana çıxarılması qaydası, müsahibədə uğur qazanmış namizədlərin vəzifəyə təyinat prosesi, habelə müsahibə nəticəsindən apellyasiya şikayətlərinə baxılması qaydası barədə təqdimat nümayiş etdirilib. Təlimin sonunda iştirakçıların sualları cavablandırılıb.