“II ixtisas qrupu üzrə qəbula salınan 91-ci test tapşırığı ümumiyyətlə səhvdir”

Bu sözləri AzEdu.az-a açıqlaması zamanı təhsil eksperti Kamran Əsədov deyib. Onun sözlərinə görə, DİM təkzib etsə də, həmin sual düzgün tərtib olunmayıb:

“26 iyulda DİM - in keçirdiyi II ixtisas qrupu üzrə D variantı sual kitabçasında (eyni test tapşırığı B variantında da var) 91 saylı test tapşırığının iki doğru cavab variantının olduğunu qeyd etmişdim. Amma DİM - in mütəxəssisləri tərəfindən deyildi ki, bu test tapşırığında səhv yoxdur, tam cavab tələb olunur. İndi isə deyirəm ki, bu test tapşırığı ümumiyyətlə səhvdir. Zəhmət olmasa, DİM - in mütəxəssisləri Azərbaycan Respublikası Konstitusiyası açıb oxusunlar. Test tapşırığında soruşulur ki, hakimliyə namizədlərə aid olan xüsusiyyətləri seçin. Amma cavab variantında olan xüsusiyyətlər hakimliyə namizədlərə aid deyil, hakimlərə aiddir.  Yəni bu test tapşırığında ümumiyyətlə doğru cavab yoxdur”.

Kamran Əsədov Azərbaycan Respublikasının Konstitusiyasından bir neçə nünumə gətirib:

“Maddə 126. Hakimliyə namizədlərə aid tələblər: Yaşı 30-dan aşağı olmayan, seçkilərdə iştirak etmək hüququna malik olan, ali hüquq təhsilli və hüquqşünas ixtisası üzrə 5 ildən artıq işləyən Azərbaycan Respublikası vətəndaşları hakim ola bilərlər. Hakimlər heç bir başqa seçkili və təyinatlı vəzifə tuta bilməzlər, elmi, pedaqoji və yaradıcılıq fəaliyyətindən başqa heç bir sahibkarlıq, kommersiya və digər ödənişli fəaliyyətlə məşğul ola bilməzlər, siyasi fəaliyyətlə məşğul ola bilməz və siyasi partiyalara üzv ola bilməzlər, vəzifə maaşından, habelə elmi, pedaqoji və yaradıcılıq fəaliyyətinə görə aldığı vəsaitdən başqa məvacib ala bilməzlər.

Yəni maddənin birinci hissəsində göstərilən şərtlər hakimliyə namizədlərə, ikinci hissədə qeyd olunanlar isə hakimlərə aiddir. Amma test tapşırığında məhz birinci hissə soruşulur. Yəni hakim ayrı şeydir, hakimliyə namizəd ayrı bir şey.  İndi də desin görüm, bu sual doğrudur, yoxsa səhv? Özünüz düzgün oxuya bilmirsiniz, necə abituriyentdən bunu tələb edə bilərsiniz? Sizin mütəxəssis - ekspertlər test tapşırığını yazanda, seçəndə qarşılarında kitab olur. Baxıb yazırlar. Amma abituriyentlərin elə bir imkanı olmur. Diqqətli olmaq lazımdır. Əminliklə deyə bilərəm ki, bu test tapşırığı ulduz ilə işarələnib abituriyentlərin xeyrinə qəbul edilməlidir. DİM - in mütəxəssisləri zəhmət olmasa, gedib öncə hakimliyə namizədlə hakim ifadələrinin fərqini öyrənsinlər.  Sonra da çıxıb desinlər ki, sual səhvdir, ya yox. Suala doğrudur demək ayıbdır.  Test tapşırığında hakimlərə namizədlərə aid olanı tapmaq tələb olunur, amma cavabda olanlar hakimlərə aiddir. Bu nədir? Bu nə deməkdir? İndi nə deyəcəksiniz?”.

Qeyd edək ki, Kamran Əsədov 26 iyulda keçirilən qəbul imtahanında II ixtisas qrupu üzrə D variant 91-ci test tapşırığına 2 doğru cavabın uyğun gəldiyini iddia edib. Həmin sualı hazırlayan DİM-in mütəxəssisi, antropoloq alim Kərəm Məmmədov isə sualın tamamilə doğru olduğunu və heç bir yanlışlığın olmadığını bildirib.