Fransada hökm sürən rekord isti hava dalğası ölkənin təhsil sisteminə ciddi təsir göstərib. Ölkənin Təhsil Nazirliyi bu gün bəyan edib ki, 1 350 məktəb artıq tam və ya qismən bağlanıb. Məktəblərin bağlanmasına əsas səbəb sinif otaqlarında temperaturun təhlükəli həddə – bəzi yerlərdə 40–41°C-yə qədər qalxması olub.
AzEdu.az-ın xarici mediadan əldə etdiyi məlumata görə, meteoroloji xidmətin məlumatına görə, Paris və ətrafında yerləşən əyalətlər daxil olmaqla 16 departament “qırmızı siqnal” vəziyyətinə keçirilib. Fransa hökuməti bu tədbirləri şagirdlərin sağlamlığı və təhlükəsizliyini qorumaq üçün zəruri addım kimi qiymətləndirib.
Fransa Təhsil Nazirliyi məsələyə münasibət bildirərək, vəziyyətin "çox istisnai" olduğunu qeyd edib. Lakin eyni zamanda bu cür ekstremal hava şəraitinin gələcəkdə tədris prosesini davamlı şəkildə poza biləcəyini və buna uyğun islahatlara ehtiyac olduğunu da vurğulayıb.
Ekspertlər xəbərdarlıq edirlər ki, davamlı iqlim dəyişikliyi nəticəsində Avropada, o cümlədən Fransada tədris ilində hava şəraiti ilə əlaqəli fasilələrin artması mümkündür. Bu da təhsil infrastrukturunun adaptasiyasını və iqlimə uyğunlaşdırılmış tədris strategiyalarının hazırlanmasını zəruri edir.
