Buraxılış imtahanında xarici dillər üzrə şagirdlərin “Yazı” məzmun xətti üzrə bilik və bacarığı cavabı yazı ilə ifadə olunan açıq tipli tapşırıq formasında deyil, 5 ballıq hekayə tipli bir yazı ilə qiymətləndiriləcək.
Belə ki, şagirdlərə təqdim edilən üç şəkil əsasında minimum 5 cümlədən ibarət hekayə qurmaq tələb olunacaq.
Bəs bu yenilik buraxılış imtahanlarının nəticəsinə necə təsir göstərəcək?
Qəbul məsələləri üzrə mütəxəssis Elçin Əfəndi mövzu ilə bağlı AzEdu.az-a açıqlamasında
“Buraxılış imtahanındakı bu dəyişiklik şagirdin xarici dil səviyyəsinin daha yaxşı inkişaf etdirilməsi üçün nəzərdə tutulub. Bu eyni zamanda müasir təhsil islahatları əsasında tətbiq olunan kurikulum proqramının yoxlanılmasıdır.
Həmçinin xarici dil fənni üzrə magistratura səviyyəsində də müəyyən dəyişikliklər edildi. Ali təhsil müəssisələrinə qəbul imtahanın birinci mərhələsi olan, tam (11 illik) orta təhsil səviyyəsində müvafiq dəyişikliklərin 2024-cü ildən aparılması nəzərdə tutulur. Bu barədə yəqin ki, yaxın günlərdə məlumat veriləcək".
Mütəxəssis bu dəyişikliyin imtahan nəticələrinə təsirindən söz açıb:
“Ballara gəldikdə isə buraxılış imtahanındakı dəyişikliklər müəyyən qədər də olsa ballara təsir edəcək. Növbəti ildə, 9 illik bazada kolleclərə qəbul zamanı müəyyən qədər ballarda enmə halı gözlənilir. Əlbəttə ki, ballarda çox deyil, müəyyən qədər enmə halları ola bilər”.
İngilis dili üzrə təlimçi Aytən Vəliyeva AzEdu.az-a açıqlamasında bu dəyişikliklərin şagird və tələbələrə xarici dili mükəmməl səviyyədə aşılamaq məqsədi daşıdığını bildirib:
"Biz müasir gənclikdən danışırıq , gələcəkdə ölkəmizi dünyada tanıtmaq üçün gənclərimizin xarici dil bilməsi mütləqdir. Xarici dil fənni üzrə 9-cu və 11-ci siniflərdəki buraxılış, eyni zamanda magistratura imtahanlarındakı dəyişikliklər gənclərin dil bacarıqlarını artırmaq məqsədi daşıyır. Hazırkı gənclik xarici dil öyrənməyə meyillidir. Buraxılış imtahanındakı dəyişikliklər xarici dillərə marağı daha da artırır. Bu proses onların təhsil və karyera həyatlarında xarici dilin nə dərəcədə önəmli olmasını göstərir".
Gülcahan Məmmədova
